DILI, 04 agostu 2022 (TATOLI)–Prezidente Komisaun Terra no Propriedade, Pascoal da Costa Soares, hateten, komisaun foin maka eziste maibé rejista ona disputa rai hamutuk 35 hosi munisípiu Dili, Bobonaro, Baucau no Lautém.
“Kazu disputa rai ne’ebé oras ne’e rejista iha ami-nia gabinete hamutuk 35, ne’ebé kazu aprezenta hosi ema sira ne’ebé iha interese mak lori rasik kazu mai rejista iha ami-nia fatin,” Prezidente Komisaun informa durante enkontru divulgasaun informasaun kona-ba servisu Komisaun Terra no Propriedade ba autoridade sira iha Universidade de Dili (UNDIL), kinta ne’e.
Notísia relevante: MJ deteta kompañia nasionál-Internasionál 10 arrenda tutan rai Estadu
Nia konsidera, ezisténsia komisaun importante atu rezolve kazu disputa sira ne’ebé daudaun akontese iha nasaun inklui servisu internasionál hodi halo levantamentu ho nasaun ne’ebé mak hasoru problema ho kazu disputa nian.
Nune’e mós, iha kazu balun komisaun simu hosi Gabinete Primeiru-Ministru rasik no aprezenta hosi Provedoria Direitu Umanu no Justisa (PDHJ, sigla portugés) tanba iha maluk balun maka seidauk iha koñesimentu no hatene edifísiu komisaun, entaun PDHJ fasilita hodi relata ba komisaun.
Kazu disputa rai hamutuk 35 komisaun halo ona painél abitrál ba kazu 24 hodi halo analiza ein termu jurídiku no tékniku, atu nune’e bele deside sé loos mak sei sai na’in ba rai ne’ebé hetan disputa.
Painél abitrál ne’e komisaun realiza liuhosi halibur deklarasaun no evidénsia balun entre parte sira ne’ebé hasoru problema disputa ne’e atu depois komisaun bele analiza molok foti desizaun ruma ba kazu disputa ne’ebé enfrenta.
“Kazu disputa ne’ebé ita rejista ne’e entre privadu ho privadu no iha privadu ho Estadu, ita mós tenke hatene katak iha lei númeru 1/2003 hosi artigu 13 fó dalan ema estranjeiru sira mós bele halo reklamasaun maibé la’ós atu sai na’in, sira bele kontinua hela maibé tenke halo arrendamentu ho Estadu,” nia tenik.
Tanba ne’e, kazu barak daudaun tama iha komisaun nia gabinete, liuliu hosi privadu no Estadu sira reklama katak sira nia rai.
“Kazu sira sei iha hela prosesu nia laran, nune’e komisaun sei haree hela hodi halo identifikasaun ho loloos. Portantu kazu disputa rai 35 ne’e barak liu hosi Dili 32, Lautém ida, Baucau ida no Maliana ida,” nia dehan.
Jornalista : Tomé Amado
Editora : Julia Chatarina
