HEADLINE, INTERNASIONÁL, MUNISÍPIU, OÉ-CUSSE (RAEOA), POLÍTIKA

Korea dignifika Noél-Ekat RAEOA nu’udar monumentu memoria ba Timor-Leste

Korea dignifika Noél-Ekat RAEOA nu’udar monumentu memoria ba Timor-Leste

Embaixadór Korea ba Timor-Leste, Kim Jeongho, tau ai-funan ba monumentu Koreanu iha mota Noel-Ekat, Sub-rejiaun Oésilo. Imajen mídia ZEESM.

OÉ-CUSSE, 04 agostu  2022 (TATOLI) – Estadu Korea dignifika mota Noél-Ekat, sai monumentu memoria ba forsa Koreanu na’in-lima ne’ebé lakon sira-nia vida iha loron 06 marsu 2003, iha suku Bobometo, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA).

Embaixadór Korea ba Timor-Leste, Kim Jeongho, akompanã hosi komandante batallaun ba matebian forsa Koreanu na’in-lima, Kim Yeong Deok, akompaña hosi Prezidente Autoridade RAEOA, Arsénio Paixão Bano hamutuk ho família enlutada, kinta ne’e inaugura projetu monumentu No’el-Ekat ne’ebé lokaliza iha suku Bobometo, sub-rejiaun Oésilo.

Diplomata Koreanu ne’e agradese ba Ministériu Asuntu Patriota Veteranu Korea nian tanba bele apoiu orsamentu hodi konstrui fatin ne’e, no agradese mós ba Ministériu Negósiu Estranjeiru no Koperasaun Korea no Timor-Leste bele fasilita família enlutada hosi Korea mai to’o fatin akontesimentu mota Noél-Ekat hodi presta omenajén.

“Laletek mota Noél-Ekat fatin ne’ebé tinan 19 liuba, forsa Korea na’in-lima lakon sira-nia vida, sira-nia sakrifísiu hodi bele serbisu ho badinas atu kontribui ba independénsia Timor-Leste, tuir provérbiu (proverbio) Korea hatete, foho sia bele muda-aan iha tinan 19 nia laran, maibé fatin ida-ne’e kuaze liu ona tinan 20, nia memoria sei nafatin la muda nafatin iha povu Timor-Leste nia fuan,” Kim Jeongho, ko’alia iha serimónia inaugurasaun ne’e.

“Ohin ita mai hamutuk iha fatin ne’e atu presta omenajen ba dedikasaun tomak, sira na’in-lima husik hela liuhosi monumentu ida-ne’e, nune’e ha’u dezeju no fiar katak monumentu ida-ne’e sei sai hanesan fatin ba povu Korea no Timor-Leste nafatin hanoin no agradese rohan laek ba sira-nia dedikasaun,” nia afirma.

Nia apela, ba família sira, durante ne’e moris iha tristeza nia laran, nia reprezenta Estadu Korea hakarak agradese nomoos husu deskulpa, maibé forsa na’in-lima sira-nia dedikasaun tomak no dadaun hela hakmatek pás iha reinu lalehan nian.

Nia garante no tau konfiansa ba Autoridade RAEOA ho povu Oésilo sei tau nafatin interese no kuidadu monumentu lulik ne’e, nia espera fatin ne’e bele sai sentru ba deskansa ba komunidade hakat liuhosi mota ne’e.

Prezidente Autoridade RAEOA, Arsénio Paixão Bano, orgullu tanba ho aten barani, Governu no família Korea mai tulun povu Timor-Leste atu normaliza pás ho estabilidade hafoin hetan nia independénsia.

“Ha’u lori povu Oé-Cusse no Timor-Leste nia naran, ha’u agradese laiha rohan ba povu Korea, liuliu família enlutada ne’ebé oferese sira-nia oan serbí iha misaun pás estabilidade iha Timor-Leste, espesiál iha Oé-Cusse,” nia orgullu.

Espoza saudozu Tenente Coronél Byungjo Min, Kim Ayeyoung, nu’udar família senti laran hakmatek no agradese ba Estadu Timor-Leste no Korea tanba prezerva fatin ne’e sai monumentu ba interese nasionál.

“Maske liu ona tinan 20 maibé nafatin tau interese maka’as kuidadu no haree ami ho di’ak, ida-ne’e ami agradese ba Estadu Korea no Timor-Leste, tan ne’e ami família fiar katak sei fila ho laran hakmatek tanba ho ita-boot sira-nia ospitalidade laran di’ak hodi bele kuidadu no prezerva fatin ne’e fatin ne’e sai memoria ba nasaun rua nian,” nia agradese.

Entretantu, Saudozu militár Korea na’in-lima ne’e lakon sira nia vida iha mota Noel-Ekat, suku Bobometo, sub-rejiaun Oésilo, iha 06 marsu 2003, bainhira hala’o misaun pás Organizasaun Nasaun Unida nian (ONU) liuhosi Peace Keeping Force (KFP) iha Timor-Leste.

Kauza hosi asidente ne’e tanba hetan dezastre naturál, udan-boot rezulta mota tún, nune’e forsa na’in-lima ne’e ho laran kmaan atu ultrapasa mota ne’e, maibé la konsege nune’e hetan asidente hodi rezulta forsa na’in-lima komposta hosi Tenente Koronél na’in-rua no Sarjentu na’in-tolu lakon vida iha mumentu ne’e.

Saudozu na’in-lima maka hanesan, Tenente Koronél Byungjo Min, Tenente Koronél Jin Kyu Park, Sarjentu Jong Hoon Baek, Sarjentu Jeong Joong Kim no Sarjentu Hee Choi.

Projetu monumentu ne’e ezekuta hosi empreza East Sunrise Timor Constructions, ho valór Orsamentu hamutuk rihun $45,700, ne’ebé aloka hosi Governu Korea liuhosi Ministériu Asuntu Patriota Veteranu Korea nian.

Notisia relevante: Família presta omenajen ba militár Koreanu na’in-lima ne’ebé lakon vida iha RAEOA

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!