HEADLINE, MUNISÍPIU, VIQUEQUE

Negosiante postu Uatucarbau preokupa ho kondisaun merkadu grave

Negosiante postu Uatucarbau preokupa ho kondisaun merkadu grave

Kondisaun merkadu postu administrativu Uatucarbau. Imajen Tatoli/Vitorino Lopes da Costa

VIQUEQUE, 04 agostu 2022 (TATOLI)–Negosiante hosi postu administrativu Uatucarbau, munisípiu Viqueque, preokupa ho kondisaun merkadu Uatucarbau ne’ebé daudaun ne’e ho kondisaun fíziku grave.

“Ami hanesan negosiante ne’ebé buka moris iha merkadu ida-ne’e, sente preokupa ho kondisaun uma merkadu tanba ita haree uma ne’e kondisaun grave tebes. Tempu udan no anin boot negosiante sira tenke hapara atividade negósiu, tanba tauk uma ninia kondisaun a’at,” Negosiante merkadu, Francisco da Costa, hateten ba Agência Tatoli, iha merkadu Uatucarbau, kinta ne’e.

Francisco hsu parte relevante tau-atensaun ba kondisaun merkadu ne’ebé oras ne’e a’at tanba kondisaun ne’e fó risku ba negosiante sira.

Notísia relevante: PNDS hahú dada bee-moos ba abitante iha Irabin de Cima

Iha fatin hanesan, Xefe aldeia Taradai, Irabin de Baixo,  Octávio José Maria, haktuir, uma-nia kalen sira kuak no uma-nia ai-rin mós a’at ona.

“Ami-nia merkadu ninia kondisaun a’at kuaze tinan barak ona, maibé parte relevante sira la mai haree hodi tau-matan. Tempu udan difikulta tebes ba negosiante sira fa’an produtu  no negosiante balun  haksesuk malu kona-ba fatin sira ne’ebé maran. Tanba ne’e, ha’u husu ba Governu tau-matan ba ami-nia merkadu hodi negosiante sira bele hala’o negósiu,” nia tenik.

Nune’e mós, Administradór postu Uatucarbau, Alfredo dos Santos, rekoñese kondisaun merkadu grave, tanba konstrui ona desde tinan 1983.

“Merkadu ne’e komunidade sira hosi lliomar no Uatulari mai fa’an hotu produtu iha ne’e. Bainhira Timor-Leste hetan ninia independénsia iha primeiru Governu, Autoridade Uatucarbau propoin duni halo merkadu ida maibé la sufisiente ba negosiante sira uza fa’an produtu,” nia dehan.

Autoridade ne’e husu ba Governu atu ajuda hadi’a merkadu hodi negosiante sira bele buka moris.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!