HEADLINE, MUNISÍPIU, VIQUEQUE

PNDS hahú dada bee-moos ba abitante iha Irabin de Cima

PNDS hahú dada bee-moos ba abitante iha Irabin de Cima

Tékniku PNDS, pesoál hosi administrasaun postu Uatucarbau hamutuk komunidade suku Irabin de Cima hatama pompa ba bee-matan Irabere, kinta (04/08). Imajen Tatoli/Vitorino Lopes da Costa

VIQUEQUE, 04 agostu 2022 (TATOLI)–Programa Nasionál Dezenvolvimentu Suku (PNDS) hahú dada bee-moos hosi bee-matan Irabere ba abitante sira hosi suku Irabin de Cima, postu administrativu Uatucarbau, munisípiu Viqueque.

“Daudaun programa PNDS foin dada bee-moos ba ami-nia suku Irabin de Cima, durante ne’e ha’u-nia komunidade falta bee-moos. Tinan barak to’o mai  Timor-Leste hetan independénsia, agora maka foin dada bee-moos ba ami-nia populasaun,”  Xefe suku Irabin de Cima, Lino Martins, hateten ba Agência Tatoli, iha bee mata Irabere, kinta ne’e.

Suku ne’e iha rekursu bee-matan boot, maibé komunidade tenke ba kuru bee ho distánsia purvolta metru 400.

“Ami agradese ba Governu Austrália no ita-nia Governu liuhosi PNDS ne’ebé tulun ona populasaun Irabin de Cima dada bee ba ami-nia komunidade,” nia akresenta.

Notísia relevante: Agrikultór Natar Irabere Presiza Tebes Tratór

Dada bee-moos ba populasaun suku Irabin de Cima hosi bee-matan Irabere to’o iha populasaun sira-nia fatin ho distánsia metru 400.

Nune’e, iha kinta ne’e ekipa PNDS hamutuk ho autoridade no komunidade halo ona serimónia rituál hafoin hatama pompa bee-nia ba bee-matan laran.

“Ami garante komunidade iha ne’e sei asesu hotu bee-moos no pompa ne’e tékniku nasionál sei akompaña bainhira mosu problema ruma sira rezolve. Ami mós sei estebelese mós regra balun hodi asegura sasán bee nian,” nia tenik.

Iha fatin hanesan, Mahein (Liurai) bee-matan Irabere, Armindo da Silva, haktuir, iha tinan 2005 governante sira mai ko’alia atu dada bee Irabere hosi postu Uatucarbau, maibé la realiza no agora maka foin bele realiza.

“Dala barak na’i-ulun sira mai ko’alia dada bee Irabere dehan lulik, tanba ne’e maka sira la dada, problema sira la konsulta ho ami. Bainhira na’i-ulun sira hakarak mai dada bee Irabere ba populasaun suku  neen  mós di’ak,  importante mai halo, ha’u prontu oferese bee hodi ita-nia komunidade bele asesu,” nia salienta.

Bee-matan Irabere foin dahuluk dada ba populasaun sira iha suku Irabin de Cima.

Orsamentu dada bee-moos hetan apoia hosi Governu Austrália ho totál hamutuk $31.884,17, enkuantu sosa materiál bee no pompa bee hetan apoia hosi FSTI.

Bee-moos ne’e sei benefisia abitante hosi suku Irabin de Cima, aldeia lima ho totál populasaun 1.000 resin hosi uma-kain purvolta 573.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!