COVALIMA, NASIONÁL

PR Horta: ”Rai ida-ne’e orgullu ho nia éroi no martir sira”

PR Horta: ”Rai ida-ne’e orgullu ho nia éroi no martir sira”

Prezidente Repúblika (PR), José Ramos Horta, partisipa iha serimónia haloot restu mortal éroi no martir na'in-34 iha Semitériu Jardín Éroi Martir Pátria Luak iha munisípiu Manufahi.

DILI, 04 agostu 2022 (TATOLI)—Prezidente Repúblika (PR), José Ramos Horta, partisipa iha serimónia haloot restu mortal éroi no martir na’in-34 iha Semitériu Jardín Éroi Martir Pátria Luak iha munisípiu Manufahi.

Notísia Relevante: MAKLN sei haloot restu mortál 610 iha Same-Aileu-Quelicai-Metinaro

Xefe Estadu ne’e hateten, nia prezensa hamutuk ho konvidadu sira-ne’e atu sai testemuña ba serimónia funerál ba éroi no martir na’in-34 ne’ebé fakar raan no mate tanba luta ba Timor-Leste nia ukun rasik an.

Prezidente Repúblika (PR), José Ramos Horta. Imajen/Mídia PR.

“Rai ida-ne’e bele orgullu ho nia éroi no nia martir sira. Estadu halo nia obrigasaun tinan sira-nia laran hahú kedas iha primeiru anu restaurasaun independénsia mak hahú kedas hanoin oinsá atu rekuiñese eroi no martir sira,” Prezidente Repúblika ne’e hateten liu hosi komunikadu imprensa ne’ebé Agência TATOLI asesu, kinta ne’e.

Nia hateten, la fasil atu identifika éroi no martir ne’ebé fó ona sira-nia kontribuisaun ba luta ho justisa no rigor.

“Balun hetan família nia ruin, ha’u bele hatete sorte. Ha’u rasik ami-nia alin feto ida mate iha Lolotoe ne’ebá, sorte populasaun haree no sorte populasaun mak hakohi nia iha 18 dezembru 1978 iha biban bombardamentu iha aldeia Anno, iha 2003 ami ba foti hakohi fila-fali iha Santa Cruz,” nia dehan.

Xefe Estadu ne’e haktuir, nia alin Guilherme ne’ebé mate iha embuskada iha Mápe nomós saudozu Nuno Horta ne’ebé hanesan Komandante FALINTIL, Brigada Xoke to’o agora seidauk hetan sira-nia ruin.

Enkuantu, restu mortál saudozu na’in-34 ne’e, iha saudozu na’in-rua mak martír deskuiñesidu, haloot iha semitériu jardín éroi no martir pátria Manufahi, bazea bá dekretu Prezidente Repúblika N.⁰ 62/2022 ne’ebé publika iha loron 2 fulan-agostu.

Serimónia funerál ne’e hahú uluk ho misa requiem ne’ebé selebra hosi, Pe. Eugênio Pereira, no tiru saltu hafoin hatun ba kampa (kuak).

Partisipa iha serimónia funerál ne’e, Segundu Vise Prezidente Parlamentu Nasionál (PN), Maria Angelina Sarmento, Prezidente Tribunál Rekursu, Deolindo dos Santos, membru Governu, Xefe Estadu Maior Jenerál Forsa Armada, Tenente Jenerál Falur Rate Laek, veteranu, komunidade no seluk tan.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!