Zumalai implementa PMOPA fó prioridade ba programa rua
COVALIMA, 03 agostu 2022 (TATOLI)–Administradór postu administrativu Zumalai, Rui dos Santos, informa Governu liuhosi autoridade administrativu Covalima implementa Programa Mão de Obra iha Postu Administrativu (PMOPA) hodi fó prióridade ba programa rua mak hamoos valeta no hamoos estrada ninin.
Notísia Relevante: Covalima lansa PMOPA simultaneamente iha postu administrativu neen
“Governu implementa Programa Mão de Obra iha Postu Administrativu (PMOPA) iha postu Zumalai, munisípiu Covalima ne’ebé ami implementa iha suku ualu prióridade ba programa hamoos valeta no hamoos estrada ninin,” Rui dos Santos hateten hato’o ba Agência Tatoli, iha resintu Administrasaun Munisípiu Covalima, Sukaer Laran, kinta ne’e.
Postu administrativu Zumalai fó prióridade ba programa rua ne’e tanba bazea ba matadalan PMOPA ne’e la fó dalan atu halo konstrusaun foun, entaun fó prióridade ba programa hamoos estrada ninin no hamos valeta de’it.
Razaun fó prióridade hamos valeta tanba relasiona ho klíma foin lalais ne’ebé akontese iha munisípiu Covalima udan boot halo bee-mota nakonu iha esgotu ne’ebé hamosu inundasaun.
“Ami presiza hamoos valeta, nune’e bainhira tempu udan karik bee halai tuir nia dalan. Ba faze dahuluk implementasaun PMOPA ne’e traballadór na’in-20 ne’ebé servisu durante loron 20 nia laran,” nia dehan.
Governu implementa PMOPA iha munisípiu Covalima ne’e hahú halo lansamentu iha loron segunda (01/08) tinan 2022.
Antes ne’e iha loron 08 fulan-jullu tinan 2022, Ministériu Administrasaun Estatál (MAE) halo sensibilizasaun Matadalan Implementasaun Programa Mão de Obra ba autoridade Covalima sira hotu.
Munisípiu Covalima hetan alokasaun OJE 2022 hosi Ministériu Administrasaun Estatál (MAE) hamutuk $3,990.360. ne’ebé aloka ba saláriu no vensimentu, bens servisu, tranferénsia públiku, kaapital menór no kapital dezenvolvimentu aumenta ho orsamentu programa Mão de Obra Postu administrativu (PMOPA).
Hosi total orsamentu refere MAE tranferese orsamentu ba programa Mão de obra Postu Administrativu (PMOPA) iha Covalima hamutuk $782,102 ba iha konta bankaria munisípiu ni’an.
Jornalista : Celestina Teles
Editór : Cancio Ximenes
