HEADLINE, MUNISÍPIU, VIQUEQUE

Autoridade husu entidade relevante prodús kartaun identidade iha suku Bahatata

Autoridade husu entidade relevante prodús kartaun identidade iha suku Bahatata

Xefe aldeia Neluai, Luís da Silva, hato’o preokupasaun durante diálogu komunitáriu, iha sede suku Bahatata, sesta (05/08). Imajen Tatoli/Vitorino Lopes da Costa

VIQUEQUE, 05 jullu 2020 (TATOLI)—Autoridade lokál husu entidade relevante hanesan Sekretariadu Tékniku Administrasaun Eleitorál (STAE) no Ministériu Justisa (MJ) atu prodús kartaun identidade iha suku Bahatata, postu Uatucarbau, munisípiu Viqueque.

“Ha’u husu STAE no diresaun notariadu ne’ebé trata dokumentu sira hanesan kartaun eleitorál, billete identidade no sertidaun RDTL, lori mai iha suku hodi povu bele asesu besik. Tanba ita haree ami-nia suku Bahatata dook tebes hosi postu no munisípiu, nune’e difikulta ba ami hodi ba halo ami-nia dokumentu sira,” Xefe aldeia Neluai, suku Bahatata, Luís da Silva, hateten durante diálogu komunitáriu, iha sede suku Bahatata, sesta ne’e.

Notísia relevante: Mákina avaria, Notariadu Covalima seidauk prodús sertidaun nascimentu   

Autoridade lokál dehan, populasaun sira hakarak ba trata sira-nia dokumentu maibé dook no kondisaun estrada mós ladún di’ak hodi populasaun halo movimentu.

“Ha’u ko’alia ida-ne’e la’ós ha’u de’it, maibé ida-ne’e ezijénsia povu Bahatata sira-nia. Kondisaun estrada a’at halo povu atu ba munisípiu susar tebes. Tanba ne’e, ha’u husu parte relevante sira karik bele mai iha suku hodi prodús povu-nia dokumentu atu povu labele la’o dook,” nia akresenta.

Luís da Silva relata, uluk komunidade preokupa ba eletrisidade, maibé agora daudaun iha sede suku Bahatata asesu ona eletrisidade.

“Ita haree ferik ka katuas sira ne’e oinsá maka to’o munisípiu ne’ebá hodi halo sira-nia dokumentu. Balun família iha Viqueque laiha karik sira bá hela iha ne’ebé maka trata sira-nia dokumentu,” nia tenik.

Nune’e, nia sujere ba entidade relevante ne’ebé toma-konta trata dokumentu, atu halo atendimentu móvel ida tama sai suku hodi povu iha área rurál bele trata dokomentu.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!