HEADLINE, SAÚDE

Governu kompromete mellora kondisaun ospitál

Governu kompromete mellora kondisaun ospitál

Primeiru-Ministru, Taur Matan Ruak, halo vizita ba pasiente sira iha HNGV, Bidau, sesta (05/08). Imajen Tatoli/Francisco Sony

DILI, 05 agostu 2022 (TATOLI)—Primeiru-Ministru (PM), Taur Matan Ruak, kompromete mellora kondisaun ospitál sira, liuliu Hospital Nacional Guido Valadares (HNGV) hodi fó atendimentu di’ak liu ba públiku.

“Governu determinadu loos atu ajuda Ministériu Saúde hadi’a kualidade ospitál sira, liliu HNGV, ospitál referénsia iha munisípiu, klínika no postu saúde sira, nune’e fasilita no ajuda redús pezu no presaun ba Ministériu Saúde,” PM hateten bainhira partisipa iha lansamentu Laboratóriu Nasionál Referénsia Tuberkuloze, iha HNGV, Bidau, sesta ne’e.

Notísia relevante: HNGV kontinua enfrenta problema rekursu umanu no ekipamentu médiku

Xefe Governu dehan, Governu nafatin husu ajuda parseiru dezenvolvimentu sira hodi mellora kondisaun HNGV tanba nu’udar ospitál nasionál presiza iha kondisaun di’ak ho fasilidade kualidade hodi atende sidadaun sira.

“Hadi’a kondisaun ospitál mak ha’u-nia mehi, tanba ne’e ami hotu servisu maka’as loos atu mellora kualidade HNGV tanba ita sei iha difikuldade barak, entaun ami kompromete no agora ami halo hela esforsu,” nia akresenta.

Faze dahuluk, iha tinan ne’e sei avansa uluk ho fatin pediatria, ne’ebé tenki kria kondisaun di’ak ba labarik sira tanba sira mak futuru nasaun nian.

“Kuandu iha tan osan bele hala’o mós iha fatin seluk. Governu sei esforsu hodi prevee orsamentu ba kondisaun no fasilidade ba ospitál sira,” PM tenik.

Iha biban hanesan, Xefe Ezekutivu agradese ba apoiu parseiru dezenvolvimentu sira hotu ne’ebé apoia ona Governu, liuliu Ministériu Saúde hodi hadi’a kondisaun no apoia fasilidade sira, nune’e sei mantein kooperasaun di’ak liután.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!