COVALIMA, POLÍTIKA

Governu lansa distribuisaun Cesta Bázika faze daruak ba benefisiáriu 15,161 iha Zulo

Governu lansa distribuisaun Cesta Bázika faze daruak ba benefisiáriu 15,161 iha Zulo

Sekretáriu Estadu Kooperativa, Elizário Ferreira, distribui cesta bázika ba benefisiariu iha suku Zulo, postu administrativu Zumalai, munisipiu Covalima. Imajen Tatoli/Celestina Teles.

COVALIMA, 05 agostu 2022 (TATOLI)–Governu liuhosi Sekretáriu Estadu Kooperativa,  Elizário Ferreira, hamutuk ho autoridade Covalima lansa distribuisaun Cesta Bázika faze daruak ba benefisiáriu ema na’in-15,161iha suku Zulo, postu administrativu Zumalai, munisípiu Covalima.

Notísia Relevante: Governu lansa distribuisaun Cesta Bázika faze daruak iha aldeia Baia Leste

Sekretáriu Estadu Kooperativa, Elizário Ferreira, informa Governu lansa no distribui Cesta Bázika ba faze daruak ne’e atu estimulu ekonomia no motiva populasaun sira kontinua mantein halo toos no halai natar hodi hasa’e produsaun iha rai-laran.

“Objetivu distribui Cesta bázika ida-ne’e atu estimulu ita-nia ekonomia rai-laran liu-liu atu motiva ita-nia populasaun sira atu nafatin prodús,” Elizário Ferreira hateten ba jornalista sira hafoin distribui Cesta Bázika iha suku Zulo, postu administrative Zumalai, sesta ne’e.

Governu distribiui Cesta Bázika ba populasaun hotu ne’ebé rejista iha baze dadus maibé ba sira ne’ebé ho sira-nia saláriu mensál $500 sei labele simu maibe populasaun sira seluk mak simu.

Administradór Munisípiu Covalima, Francisco de Andrade, hato’o agradesimentu ba VIII Governu Konstitusionál ne’ebé  implementa programa Cesta Bázika ba faze daruak.

“Ha’u hato’o agradese ba ita-nia Governu bainhira fó prióridade hodi implementa polítika Cesta Bázika ne’ebé halo distribuisaun ba faze daruak nian,” nia dehan.

Razaun hato’o agradese ba Governu tanba Governu hatene situasaun povu sira-ne’ebé enfrenta iha baze, nune’e ho programa liuhosi distribuisaun cesta bázika fó mós motivasaun ba povu sira atu halai natar no halo toos.

Antes seidauk implementa programa Cesta Bázika, Polulasaun sira la faan foos-rai iha estrada ninin maibé Governu nia polítika distribuisaun cesta bázika ne’e halo populasaun sira faan sira-nia foos rai iha estrada ninin

Ho nune’e, autoridade mós husu populasaun sira atu enkoraja malu hodi halai natar no halo toos hodi hasa’e produsaun iha rai-laran.

Aleinde ne’e, autoridade ne’e mós apresia ba kompañia Aitula ne’ebé distribui Cesta Bázika fó satisfasaun ba komunidade sira, tanba ne’e ba oin kompañia tenke mantein nafatin.

Benefísiariu Cestas Bázika, Amaro Nascimento, sente kontente bainhira Governu halo distribuisaun cesta bázika ba populasaun sira, tanba distribuisaun cesta bázika faze dahuluk sira la hetan.

“Ohin loron, ami kontente maske distribuisaun sesta bázika iha tinan kotuk ami la hetan ohin mak foin simu ami kontente no hato’o agradese ba Governu,” nia informa.

Ho distribuisaun Cesta Bázika ida-ne’e bele motiva populasaun sira iha terrenu atu badinas halo toos no halai natar.

Diretór Kompañia Aitula, Siveiro Ferreira “Maubere”, reforsa kompañia Governu halo ona distribuisaun cesta bázika ba populasaun sira iha suku Zulo, postu administrative Zumalai hamutuk 15,161

Kompañia Aitula distribui cesta bázika ba populasaun ho item sira hanesan foos-mutin kilograma neen (6), foos-mean kilograma ida (1) fore-rai, mina nuu virgen, masin-midar, kafé uut, masin, sabaun deterjen no hosi item sira-ne’e protudu lokál 81% no produtu importadu 19%.

“Molok kompañia atu distibui halo distribuisaun, kompañia halo ona preparasaun ba benefisiariu 15,161, ita halibur de’it mak karau ne’ebe  hosi postu Zumalai rasik oho hodi distribui naan fresku ba benefisiáriu sira,” nia hateten.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!