HEADLINE, MUNISÍPIU, OÉ-CUSSE (RAEOA), SEGURANSA

Koreanu na’in-lima mout iha Noel Ekat, ida seidauk hetan to’o ohin loron

Koreanu na’in-lima mout iha Noel Ekat, ida seidauk hetan to’o ohin loron

Inan hosi saudozu sarjentu Jeongjoong Kim, Jang Hong Yeo, tanis bainhira presta omenajen ba monumentu koreanu na’in-lima ne’ebé mout iha mota Noel Ekat, tanba nia oan mane nia ruin dezde 2003 seidauk hetan to’o ohin loron. Imajen Tatoli/ Abílio Elo Nini.

OÉ-CUSSE, 05 agostu  2022 (TATOLI) – Inan hosi saudozu sarjentu Jeongjoong Kim, Jang Hong Yeo, ho matan-been husu ajuda ba povu Oé-Cusse atu ajuda buka nia oan mane mesak nia mate-isin ne’ebé mout iha mota Noé-Ekat dezde 2003 to’o ohin loron seidauk hetan nia ruin.

Saudozu militár Korea na’in-lima ne’e lakon sira-nia vida iha mota Noél-Ekat iha suku Bobometo, sub-rejiaun Oésilo, iha 06 marsu 2003, bainhira hala’o misaun pás ONU nian liuhosi Peace Keeping Force (KFP) iha Timor-Leste.

Kauza hosi  asidente ne’e tanba hetan dezastre naturál, udan-boot mota tún, nune’e forsa na’in-lima ne’e atu ultrapasa mota refere, maibé la konsege nune’e hetan asidente hodi rezulta forsa na’in-lima komposta hosi Tenente Koronél na’in-rua no Sarjentu na’in-tolu lakon vida iha mumentu ne’ebá.

Saudozu na’in-lima ne’e maka hanesan, Tenente Koronél Byungjo Min, Tenente Koronél Jin Kyu Park, Sarjentu Jong Hoon Baek, Sarjentu Jeong Joong Kim no Sarjentu Hee Choi.

“Ha’u-nia oan mane mesak laiha maun alin no bin, nia seidauk hola feto, nia apa mate ona tanba moras, agora ha’u moris mesak de’it, ha’u-nia laran moras tebes, ha’u husu ajuda ba komunidade sira ajuda buka netik nia ruin sira, atubele sunu-lilin, ha’u hadomi tanba nia mesak, maibé nia kolega na’in-haat seluk hetan ona,” Jang Hong Yeo, koa’lia ho mata-been bainhira presta omenajen iha monumentu Noél-ekat, Oésilo, kinta ne’e.

Sarjentu Jeongjoong Kim moris iha Jeollabuk-do, Namwon, Korea, iha loron 08 abríl 1981, ho nia nível ekukasaun remata iha Eskola Sekundária Informasaun no Arte Tradisionál, Namwon (agora bolu, Namwon Traditionál Art High School).

Nune’e mós nia karreira prinsipál iha loron 09 outubru 2001 hakna’ar-aan iha batallaun substituisaun militár ba 306 rekrutadu, ho númeru militár 01-73052796 no iha 6 marsu 2003 mate iha Timor-Leste, iha mota Noél-Ekat, mate nu’udar motorista ekipa apoia grupu manutensaun pás ONU nian ba 522.

Embaixadór Korea ba Timor-Leste, Kim Jeongho, husu tulun mós ba autoridade RAEOA ho povu Oé-Cusse atu ajuda buka tuir mate-isin Sarjento Jeongjoong Kim.

“Espesialmente, ha’u hakarak husu ba Prezidente Autoridade RAEOA ho komunidade Oé-Cusse, liuliu komunidade Oésilo, atu utiliza fatin Noél-Ekat, hodi nafatin la kolen atu buka-tuir mate isin Sarjentu Jeongjoong Kim to’o tempu ne’ebé bele hetan,” nia husu.

Notisia relevante: Korea dignifika Noél-Ekat RAEOA nu’udar monumentu memoria ba Timor-Leste

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!