HEADLINE, INTERNASIONÁL, NASIONÁL, POLÍTIKA

PM simu notísia Timor-Leste iha kondisaun tinan oin tama ASEAN

PM simu notísia Timor-Leste iha kondisaun tinan oin tama ASEAN

Primeiru-Ministru, Taur Matan Ruak. Imajen Tatoli/Francisco Sony

DILI, 05 agostu 2022 (TATOLI)–Primeiru-Ministru (PM), Taur Matan Ruak, foin lalais ne’e simu notísia di’ak Timor-Leste iha kondisaun atu tinan oin bele adere ba Asosiasaun Nasaun Sudeste Aziátiku (ASEAN, sigla inglés).

“Ha’u rona notísia di’ak loos, katak kondisaun iha atu Timor-Leste tama ASEAN iha tinan oin (2023), ne’ebé posibilidade tinan oin ita tenki tama no ha’u espera tinan oin selae Timor kansela nia adezaun,” PM Taur hateten bainhira partisipa iha lansamentu Laboratóriu Nasionál Referénsia Tuberkuloze, iha Hospital Nacional Guido Valadares (HNGV), sesta ne’e.

Notísia relevante: Atleta Timor-Leste manán medalla 13 iha ASEAN Para Games 2022

Xefe Governu dehan, nia sempre hateten ba nasaun membru asosiasaun, hanesan mós deklarasaun Prezidente Repúblika nian katak tama lalehan fasil liu do que tama ASEAN.

“Ha’u la hatene tanba saida, foin lalais ha’u hasoru malu ho Primeiru-Ministru Singapura no husu ba nia katak imi (Singapura) mak lakohi Timor tama? maibé nia rejeita katak la loos, nia dehan sira ajuda ita,” nia akresenta.

Nune’e, Xefe Ezekutivu espera nasaun membru sira hotu bele ajuda Timor-Leste tama ASEAN.

“Ha’u hanesan Primeiru-Ministru kuandu delegasaun ASEAN nian mai, ha’u husu ba sira hakarak Timór tama ka lae, se hakarak prepara roadmap ba ami se lakohi hateten atubele ami prepara,” nia tenik.

Liga ba infraestrutura, Eis Xefe Estadu ne’e husu ba país membru sira atu labele avalia Timor-Leste ho sira-nia realidade.

“Ha’u husu ba país sira atu labele avalia Timor bazeia ba sira-nia realidade, tanba ita foin ukun-an tinan 20, kompara ho país sira balun tinan 50 piór liu ita, maibé sira ezije Timor-Leste tinan 20 atu sai hanesan sira. Ezemplu maka ita viajen bá Roma ne’e la halo loron-ida, entaun dezenvolvimentu nasaun lori tempu. Klaru katak Timor mós lakon tempu barak, tinan 20 ita lakon, Xina iha tinan 20 bele hasai millaun 800 iha probreza, Timor iha tinan 20 sei iha 40% kiak, ne’e signifika ita servisu maka’as,” PM dehan.

Hahú tinan 2011, Timor-Leste hato’o pedidu adezaun ba ASEAN, maibé to’o ohin loron seidauk konsege adere ba asosiasaun.

Ministériu Negósiu Estranjeiru no Kooperasaun (MNEK) kontinua analiza kle’an kona-ba polítika no kuadru regulamentár, ne’ebé sei aprezenta ba Konsellu Ministru hodi halo aprovasaun.

Aleinde ne’e, halo mós elaborasaun dokumentu Rejime Komérsiu Externu no enkuadramentu legál sira.

ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.

Maski Timor-Leste daudaun ne’e seidauk adere ba ASEAN, maibé partisipa ona eventu balun ho nasaun membru sira.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!