DESPORTU, DILI, HEADLINE, INTERNASIONÁL

Atleta Timor-Leste manán medalla 13 iha ASEAN Para Games 2022

Atleta Timor-Leste manán medalla 13 iha ASEAN Para Games 2022

Primeiru-Ministru, Taur Matan Ruak no Sekretáriu Estadu Juventude no Desportu, Abrão Saldanha, hala'o despedida ho atletas paralímpikus, hodi ba kompete iha jogu ASEAN para Games ne'ebé sei realiza iha Solo Indonesia. Iha Palásiu Governu Dili, kinta (21/07). Imajen Tatoli/Francisco Sony

DILI, 05 agostu 2022 (TATOLI) –Atleta Timor-Leste konsege manán medalla hamutuk 13, iha eventu Sudeste Aziátiku (ASEAN) Para Games 2022 dala-11, ne’ebé hahú hosi 30 jullu to’o 05 agostu 2022  iha Solo, Jawa Tengah-Indonézia.

Hosi totál medalla 13 ne’ebé oferese provizóriu hosi atleta Timor-Leste, kompostu medalla osan mean (emas) hamutuk neen (6), medalla osan mutin (perak) neen (6) no osan metan (perunggu) hamutuk mak ida (1).

Notísia relevante:  Atleta Timoroan hetan medalla osan mean tolu iha ASEAN Para Games 2022

Medalla hirak ne’e oferese hosi atleta hosi modalidade desportivu hanesan Atletizmu, Ténis meza no hi’it besi.

Atleta Timor-Leste ne’ebé rekolla medala hirak ne’e mak hanesan atleta Atletizmu Teofilo Freitas, Domingos Lobato Pereira no Domingas da Costa.  Enkuantu, hosi modalidade hosi ténis meza mak Pascoela dos Santos, Abelita Borges no Bernardo de Carvalho no Modalidade hiit besi mak José Aniceto António Serão.

Ho nune’e, Xefe Delegasaun Atleta Timor-Leste ba eventu Rejionál ASEAN Para Games 2022 iha Solo Indonézia, Joãozinho Fereira da Conceição Fernandes, informa iha loron dalimak eventu rejional ne’e Atleta Timor-Leste konsege rekolla ona medalla hamutuk 13.

“Eventu ASEAN Para Games daudaun la’o besik ramata ona. Nune’e, totál medalla ne’ebé ita hetan hamutuk 13 hosi modalidade tolu ne’ebé mai partisipa iha eventu ne’e,” Xefe Delegasaun ne’e hateten ba Agência TATOLI via WhatsApp, sesta ne’e.

Entretantu, Atleta hosi Modalidade Atletizmu, Teofilo Freitas, hateten sente kontente bele reprezenta Timor-Leste hodi konsege oferese medalla osan mean tolu ba Timor-Leste.

“Ha’u pesoál sente kontente tebes, tanba bele oferese ona medalla ba nasaun Timor-Leste no agradese ba ha’u ho klube JAVXIM no treinadór Rui Alves Amarál hodi hatudu prestasaun di’akiha eventu internasionál ne’e,” nia agradese.

Iha eventu ASEAN Para Games, Timor-Leste bá kompete iha modalidade tolu mak hanesan, Para Atletizmu, Ténis Meza no Hertofelizmu (angkat besi).

Hosi modalidade tolu ne’e Para atletizmu reprezenta atleta na’in-neen, kompostu hosi feto tolu mane tolu, Para ténis meza reprezenta mós atleta na’in-lima, mak feto rua no mane tolu no Hiit besik ka angkat besi mak mane na’in-haat.

Atleta hirak ne’e CPNTL no SEJD hala’o preparasaun iha sentru treinamentu durante fulan-tolu hahú maiu to’o arranka bá Indonézia no ikus hatudu rezultadu di’ak.

Atleta hirak ne’e selesionadu hosi federasaun ida-idak ne’ebé hatudu prestasaun hodi reprezenta Timor-Leste iha eventu rejionál ne’e.

Orsamentu ne’ebé Governu gasta ba atleta hirak ne’e iha sentru treinamentu durante fulan tolu hamutuk $38.410 no orsamentu totál gasta ba atleta sira ba partisipa iha eventu ne’e hamutuk $65.679,50.

Atleta ho ekipa sira sei fila mai Timor-Leste iha loron 08 agostu agora tanba atividade ramata ona.

Notísia relevante:  PM despede atleta nasionál bá partisipa ASEAN Para Games 2022

Jornalista: Hortencio Sanchez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!