DESPORTU, DILI, HEADLINE, INTERNASIONÁL

Atleta Timoroan hetan medalla osan mean tolu iha ASEAN Para Games 2022  

Atleta Timoroan hetan medalla osan mean tolu iha ASEAN Para Games 2022  

Atleta Timoroan oferese medalla tolu ba Timor-Leste iha ASEAN Para Games 2022.Imajem/SEJD

DILI, 02 agostu 2022 (TATOLI) – Atleta hosi modalidade Atletizmu no Tenis Meza, konsege okupa primeiru lugár, hodi hetan medalla osan-mean tolu, iha kompetisaun Sudeste Aziátiku (ASEAN) Para Games 2022 ba dala-11 iha Solo, Jawa Tengah-Indonézia.

Medalla osan mean ne’e oferese hosi atleta ho modalidade atletizmu, Teófilo Freitas no Atleta hosi modalidade Tenis Meza  mak Abelita Borges Fernandes Soares ho Pascoela dos Sanots Pereira.

Notísia relevante:  PM despede atleta nasionál bá partisipa ASEAN Para GAMES 2022

Ho nune’e, Atleta Teófilo Freitas, sente orgullu bele oferese tan medalla osan mean ida ba Timor-Leste, iha kompetisaun ASEAN Para Games tinan ne’e.

“Sente kamaan no orgullu tanba Governu liuhosi Sekretáriu Estadu Juventude no Desportu (SEJD) fó oportunidade hodi sai primeiru lugar no konsege oferese tan medalla osan mean ida ba Timor-Leste,” dehan Teofilo ba Agência TATOLI via media sosiál, tersa ne’e.

Medalla osan mean ne’ebé atleta Timoroan ne’e rekolla, liuhosi kurida ho metru 1.500 ne’ebé kompete hosi atleta nasaun 10 iha ASEAN hanesan, Indonézia, Filipina, Myanmar, Vietname, Laos, Táilandia, Brunei Darusalam, Malázia, Kamboja no Singapura.

Maske, primeiru lugar iha kurida metru 1.500, maibé kuarta (03/08) no kinta (04/08) sei kompete fali kurida ho metru 400 no metru 800.  Iha kurida ne’e mak sai primeiru lugar nafatin sei hetan tan medalla osan mean.

Hahú hosi tinan 2018, Atleta Teófilo konsege okupa iha primeiru lugar no lori ona medalla osan mean ida mai Timor-Leste no prestasaun ne’ebé atleta ne’e iha seidauk iha atleta seluk iha ASEAN mak hatun.

“Ha’u nia preparasaun minimu loos, maibé hatudu rezultadu di’ak iha kurida 1.500 no sei kontinua esforsu an atu manán tan iha metry 400 no metro 800,” Atleta ne’e kompromete.

Atleta ne’e afirma tan iha atleta na’in rua hosi modalidade Tenis Meza mós sai primeiru lugar hodi oferese medalla osan mean rua, maske jogu seidauk ramata.

“Atleta na’in rua ne’e mak hanesan, Abelita Borges Fernandes no Pascoela dos Santos Pereira. Nune’e totál medalla osan mean tolu ona ma kami rekolla iha eventu ne’e,” nia afirma.

Notísia relevante:  Teófilo Dedika Medalla Osan Mean Ba Timor 

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!