DILI, 21 jullu 2022 (TATOLI) – Atleta timoroan hosi modalidade tolu, ne’ebé reprezenta Timor-Leste bá partispa jogu Sudeste Aziátiku (ASEAN) Para Games ba dala-11, ne’ebé sei hala’o iha Solo, Jawa Tengah-Indonézia, iha loron 30 jullu to’o 06 agostu tinan ne’e.
Tanba ne’e, ohin reprezentante atleta nasionál, ne’ebé akompaña hosi Sekretáriu Estadu Juventude no Desportu (SEJD), Abrão Saldanha, ho reprezentante Komite Paraolímpiku Nasionál Timor-Leste (CPNTL, portugés), despede ho Primeiru Ministru (PM), Taur Matan Ruak, hodi bele arranka bá partisipa eventu rejionál ne’e.
“Imi ba kompete tenke iha vontade para manán ne’e importante tebes, ita nasaun ki’ik, maibé laiha nasaun boot ida atu domina ita. Imi tenke konkista vitória hodi foti ita nia nasaun nia naran,” PM Taur hateten iha diskursu despedida ho atleta nasionál sira, iha Palasiu Governu, kinta ne’e.
Xefe Governu enkoraja mós atleta hotu tanba sai hanesan Embaixadór Timor –Leste nian iha eventu rejionál no internasionál tenke hatudu ka kompete ho dignidade, liuliu lakon karik ho dignidade no manán mós ho dignidade hodi foti nasaun nia naran.
“Ha’u espera imi bá ho di’ak hodi tuir kompetisaun sira to’o fila-fali mai mós ho di’ak,” PM Taur espera.
Iha biban hanesan, Sekretáriu Estadu Juventude no Desportu (SEJD), Abrão Saldanha, agradese ba Primeiru Ministru nia disponibilidade hodi halo despedida ho atleta nasionál sira atu bá kompete iha eventu rejionál ne’e.
“Lori Komite Paraólimpiku Nasionál Timor-Leste no atleta sira hotu agradese ba Primeiru Ministru nia disponibilidade hodi halo despedida ho atleta sira hotu ho di’ak no apoia tebes atividade desportu iha Timor -Leste,” SEJD Abrão agradese.
Tanba ne’e, nia dehan atleta sira simu responsabilidade hotu atu lori ka reprezenta Timor-Leste bá kompete iha eventu internasionál sira.
“Ami hamutuk ho federasaun sira hotu asume responsabilidade hosi husik termonolojia partisipasaun no ita hahú liafuan kompetisaun. Tanba tinan 20 liu ona federasaun no atleta sira konsiente no prontu kompete hodi buka medalla no bá atu manán, la’ós ona tempu atu ita ba partisipa de’it,” nia garante.
Iha eventu ASEAN Para Games, Timor-Leste sei bá kompete iha modalidade tolu mak hanesan, Para Atletizmu, Para Tennis Meza no Para Hertofelizmu (angkat besi).
Hosi modalidade tolu ne’e Para atletizmu sei reprezenta atleta na’in-neen, kompostu hosi feto tolu mane tolu, Para tennis meza reprezenta mós atleta na’in-lima, mak feto rua no mane tolu no Hiit besik ka angkat besi mak na’in-haat, mesak mane de’it.
Atleta hirak ne’e CPNTL no SEJD hala’o ona preparasaun iha sentru treinamentu durante fulan-tolu hahú maiu too ohin loron arranka bá ona ba Indonézia.
Atleta hirak ne’e selesionadu hosi federasaun ida-idak ho prestasaun di’ak mak federasaun sira deside nomeia hodi reprezenta Timor -Leste iha eventu rejionál ne’e.
Orsamentu ne’ebé Governu gasta ba atleta hirak ne’e iha sentru treinamentu durante fulan tolu hamutuk $38.410,00 no orsamentu totál gasta ba atleta sira ba partisipa iha eventu ne’e hamutuk $65.679,50.
Entretantu, atleta Teofilo Freitas hosi modalidade Atletizmu, hateten sei kompete ho másimu iha eventu ne’e hodi hamorin Timor-Leste nia naran.
“Ami sei kompete ho másimu hodi reprezenta ita nia nasaun nia naran, ha’u hakarak hamorin dala ida tan ita nia nasaun nia naran hanesan 2018, ne’ebé ha’u sai primeiru lugar iha Jakarta Indonézia iha ASEAN Para Games,” nia kompromete.
Eventu ne’e sei partisipa hosi atleta ema ho defisiensia fíziku hosi nasaun 11 iha ASEAN hanesan, Indonézia, Singapura, Laos, Myanmar, Kamboja, Filipina, Tailándia, Brunei Darusalam, Malázia no Timor-Leste.
Jornalista: Hortencio Sanchez
Editór : Florencio Miranda Ximenes
