EKONOMIA, HEADLINE

Relijiaun lima hosi ATR-TL sei kria núkleu atu dezenvolve atrasaun turístika

Relijiaun lima hosi ATR-TL sei kria núkleu atu dezenvolve atrasaun turístika

Diretór Ezekutivu Asosiasaun Tuirmsu Relijiouzu Timor-Leste (ATR-TL), Manuel Vong. Imajen Tatoli/Francisco Sony

DILI, 05 agostu 2022 (TATOLI)—Relijiaun lima hosi Asosiasaun Turizmu Relijozu Timor-Leste (ATR-TL) hanesan katólika, hindu, musulmanu, protestante no budista sei kria núkleu ka sentru atu dezenvolve atrasaun turístika sira iha Timor-Leste.

Diretór Ezekutivu ATR-TL, Manuel Vong, hateten, inisiativa ne’e atu aposta dezenvolvimentu pakote viajen atividade kada relijiaun no kria kooperativa.

“Ida-ne’e estratejia no polítika hosi asosiasaun. Núkleu ida-ne’e sei dezenvolve no fó koñesimentu kona-ba istória ho objetivu kada rejiaun idaidak ho nia fiar bele aprezenta kona-ba turístika relijiaun,” Manuel Vong informa ba Agência Tatoli, iha ninia knaar-fatin, Aitarak-laran, Dili, sesta ne’e.

Notísia relevante: Governu no USAID aprezenta dezenvolvimentu Cristo Rei ba setór privadu

Nia dehan, asosiasaun ATR-TL nia ezisténsia hanesan inlukrutiva, maibé estatutu organizasaun ne’e prevee ba kriasaun núkleu hodi kada grupu bele kria ba atividade hodi hetan lukru iha asosiasaun nia-laran.

“Turizmu ida-ne’e ninia objetivu ikus atu haree mós ba negósiu, hanesan kriasaun ba atividade sira hanesan empreendedorizmu,” nia akresenta.

Núkleu ne’e hanesan dinamizadór iha zona espesiál turizmu relijiozu hosi asosiasaun atu prepara populasaun lokál sira.

“Preprasaun atu dezenvolve atrasaun turístika mak hanesan empreendedorizmu, opeda, preprasaun ba mesajen fiar, kultu kada relijiaun, jestaun seguransa no operasionál, planu ordenamentu no dezenvolvimentu kona-ba konstrusaun bázika, manutensaun ba zona ka lokál, inklui servisu saúde no ospitalidade,” Diretór Ezekutivu ATR-TL tenik.

Kada relijiaun sei dezenvolve núkleu ho objetivu fó resposta ba nesesidade turístika, tanba turizmu haree mós ba atividade negósiu.

“Sira-nia parte prepara ona rekursu umanu atu dezenvolve atrasaun turístika relijioza iha rai-laran,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!