EDUKASAUN, HEADLINE, MUNISÍPIU, VIQUEQUE

EBC 01 Viqueque hahú realiza ezame períodu daruak

EBC 01 Viqueque hahú realiza ezame períodu daruak

Diretór Ensinu Báziku Sentrál 01 Viqueque, Agapito Martins. Imajen Tatoli/Vitorino Lopes da Costa

VIQUEQUE, 08 agostu 2022 (TATOLI)–Diretór Ensinu Báziku Sentrál (EBC, sigla portugés) 01 Viqueque, Agapito Martins, informa, estudante EBC 01 Viqueque no Ensinu Báziku Filiál (EBF) hamutuk haat ohin hahú ezame.

“Ami hahú fó ezame períodu daruak ba estudante sira iha EBC 01 Viqueque no iha mós EBF  haat ne’ebé realiza hotu ezame períodu daruak nian,” Diretór hateten ba Agência Tatoli, iha ninia knaar fatin, Beloi, segunda ne’e.

Notísia relevante: Estudante Viqueque na’in-26.826 partisipa iha ezame períodu daruak ohin

Eskola ne’e hahú ezame ba relijiaun no matemátika, ne’ebé daudaun estudante sira prienxe pontu ezame iha aula laran.

“Iha ezame daruak ne’e ha’u sente normál kompara ho tinan 2021 ne’ebé mosu moras COVID-19 no difikulta eskola sira realiza ezame, maibé iha tinan ida-ne’e preparasaun no realizasaun ezame ne’e la’o di’ak tebes,” nia akresenta.

Preparasaun matéria ba ezame antes ne’e profesór sira hanorin tuir kurríkulu, nune’e estudante sira estuda matéria sira ne’ebé durante ne’e sira simu.

“Dadus estudante iha EBC 01 Viqueque hamutuk 406. Ami-nia estudante na’in-haat maka deside lakoi eskola no ami bolu kedas estudante sira-nia inan-aman mai husu, maibé estudante nia inan-aman deside tuir oan sira nia vontade,” Diretór akresenta.

EBC 01 Viqueque iha filiál haat kompostu hosi EBF Uaimori ho totál estudante 320, EBF Mamulak iha estudante 347, EBF Buanurak ho estudante 241 no EBF Ramahama ho totál estudante 119.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!