VIQUEQUE, 08 agostu 2022 (TATOLI)–Diretór Servisu Saúde Munisípiu Viqueque, Francisco de Carvalho, relata, estudante Viqueque hamutuk 10.316 ho idade 12 to’o 17 simu ona programa vasina Pfizer hodi prevene moras COVID-19, konta to’o loron 07 agostu 2022.
“Komunidade ne’ebé simu vasina doze datoluk ka booster iha munisípiu Viqueque ho totál 15.150. Dadus ne’e konta to’o domingu horiseik,” Diretór informa iha ninia knaar fatin, Boromatan, Viqueque vila, segunda ne’e.
Notísia relevante: Labarik idade 12 to’o 17 simu vasina Pfizer doze dahuluk hamutuk 43.760
Daudaun ekipa profisionál saúde sira iha munisípiu Viqueque no postu sira kontinua fó vasina Pfizer ba estudante sira no fó vasina booster ba komunidade iha aldeia no suku sira.
“Ami kontinua fó vasina ba ita-nia estudante no pesoál saúde tama-sai uma hodi buka tuir komunidade ne’ebé seidauk hetan vasinasaun. Hafoin ita buka komunidade ne’ebé mak iha liu aldeia no área rurál sira fó vasina,” nia akresenta.
Stock vasina Pfizer no booster iha munisípiu Viqueque sei sufisiente hodi fó vasina ba estudante no komunidade ne’ebé maka simu doze datoluk.
“Kona-ba stock vasina Pfizer no booster iha munisípiu Viqueque no postu saúde lima daudaun ne’e stock sei sufisente hodi fó atendimentu ba ita-nia komunidade. Númeru stock vasina Pfizer no booster, ha’u ladún lembra maibé iha jelera laran ha’u haree sei sufisente. Tanba dadus ne’e orsida tuku lima maka foin ami halo relatóriu ba stock,” nia tenik.
Profisionál saúde munisípiu Viqueque ho meiu oin-oin maka tama-sai uma hodi fó vasina ba komunidade ne’ebé hela liu ba área rurál atu komunidade bele hetan vasina.
Jornalista : Vitorino Lopes da Costa
Editora : Julia Chatarina
