DILI, 27 juñu 2022 (TATOLI)— Xefe Departamentu Tékniku no Programatiku iha Servisu Saúde Munisipál Dili, Anacleto Aparicio Gutteres, informa to’o oras ne’e labarik idade 12 to’o 17 ne’ebé simu ona vasina Pfizer doze dahuluk hamutuk 43.760.
“Labarik idade tinan 12 to’o menus 18 iha munisípiu Dili ne’ebé simu vasina Pfizer doze dahuluk hamutuk 43.760 ka 103% no doze daruak hamutuk 36.686 ka 86,3%,” Xefe Departamentu ne’e hateten ba iha nia kna’ar fatin Formoza-Dili, segunda ne’e.
Tuir tarjetu husi Ministériu Saúde, iha munisípiu Dili tenke vasina doze kompletu ba labarik idade 12 to’o menus idade hamutuk rihun 43 no mós labarik la eskola hamutuk rihun 6.
“Labarik ne’ebé la eskola mak seidauk másimu atu simu sira vasina, nune’e profisionál saúde sira agora lori vasina tama sai uma. Tanba esforsu hotu-hotu ita halo, maibé sei menus ita mós loke nafatin iha sentru saúde sira iha Dili laran hodi sira ba simu vasina,” Responsavél ne’e akresenta.
Daudaun ne’e, Profisionál Saúde Munisipál Dili hala’o vasina hosi uma ba uma iha postu lima hanesan Dom-Aleixo, Cristo-Rei, Na’in-Feto, Vera-Kruz no Metinaro.
Atividade vasina uma ba uma ne’e hetan apoia másimu hosi Saúde ba Ema Hotu (SABEH) tanba hakarak proteje ema nia saúde hosi moras COVID-19.
Aleinde ne’e, tuir dadus populasaun elijível tinan 18 ba leten, ne’ebe simu ona vasina to’o iha loron 26 juñu 2022, tuir sistema informasaun Saúde iha Ministériu Saúde, hanesan kumulativu doze dahuluk iha Dili (88,1%) no kumulativu doze daruak iha Dili (83,3%).
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 86,2% no simu ona doze daruak 74,5%.
Jornalista : Felicidade Ximenes
Editór : Florencio Miranda Ximenes
