DILI, 08 agostu 2022 (TATOLI)—Estudante Eskola Ensinu Sekundáriu Jerál (ESJ) Finantil Ai-mutin hamutuk 1.794 maka partisipa iha ezame períodu daruak, segunda ne’e, maibé karteira eskolár la to’o atu estudante sira tuur.
“Ita-nia fasilidade la sufisiente, tanba ne’e ita boot sira haree iha estudante balun tuur de’it iha rai no balun hamriik maka tuir ezame,” Diretór ESJ Finantil Ai-mutin, Hermenegildo Mascarenhas, informa iha ninia knaar fatin, segunda ne’e.
Tuir Diretór, loloos Eskola ESJ Finantil iha ona fasilidade kadeira no meza sufisiente ba estudante 1.794 tanba Ministériu Edukasaun Juventude no Desportu (MEJD) rasik antes ne’e rekolla ona kadeira a’at hamutuk 215 hodi lori hadi’a iha Eskola Tékniku Vokasionál Becora.
“Hafoin halo reparasaun hotu mak bainhira distribui fali mai la tuir númeru ne’ebé sira foti. Ami-nia kadeira a’at hamutuk 215 maka mai rekolla hodi lori hadi’a iha Eskola Tékniku Vokasionál Becora, maibé hafoin hadi’a hotu sira haruka fali mai 150 de’it. Tanba ne’e mak realidade ami-nia estudante sira balun kontinua hamriik no tuur iha rai maka tuir ezame,” nia akresenta.
Notísia relevante: Estudante 17.195 iha Dili prepara tuir ezame nasionál
Daudaun ne’e eskola fahe ona estudante sira ba turma rua, dadeer no lorokraik, tanba sala aula limitadu, ne’ebé hosi parte dadeer estudante 12o ano hamutuk 681 kompostu hosi siénsia teknolojia 372 no siénsia sosiál umana 354 maka tuir ezame.
Nune’e, hosi parte lorokraik estudante 10o ano hamutuk 352 kompostu hosi siénsia teknolojia 175 no siénsia sosiál umana 177, estudante 11o ano hamutuk 761 kompostu hosi siénsia teknolojia 395 no siénsia sosiál umana 366, ho nune’e estudante Finantil 1.113 maka tuir ezame.
“Ami iha de’it sala aula 15 maka fahe ba turma rua, dadeer no lorokraik. Kada sala ami iha estudante hamutuk 50 to’o 60, ne’ebé estudante dadeer 681 de’it, ne’ebé kadeira no meza la sufisiente ona oinsá ho estudante lorokraik hamutuk 1.113,” nia tenik.
Ezame períodu daruak ne’ebé MEJD realiza ba estudante iha territóriu nasionál ne’e bazeia ba kalendáriu ne’ebé termina ona, hahú hosi loron 08 no sei ramata iha 13 agostu 2022.
Jornalista : Tomé Amado
Editora : Julia Chatarina
