DILI, 08 agostu 2022 (TATOLI)–Banku Sentrál Timor-Leste (BCTL, sigla portugés) lansa relatóriu trimestrál fundu mina-rai Timor- nian ba trimestre daruak, ne’ebé termina iha loron 30 juñu 2022.
Relatóriu ne’e hatudu katak kapitál fundu iha trimestre daruak tun ba biliaun $17,84, kompara ho trimestre dahuluk ho montante biliaun $19,12.
Vise-Governadór BCTL, Venâncio Maria Alves, hateten, relatóriu ne’e mós hatudu katak totál reseita ne’ebé simu iha trimestre ne’e hamutuk millaun $49,06, kompostu hosi kontribuisaun kontribuinte sira ba fundu hamutuk millaun $37,63 no pagamentu royalty simu hosi Autoridade Nasionál Petróleu no Minerál (ANPM) hamutuk millaun $11.43.
“Rendimentu hosi investimentu fundu nian ne’e hamutuk negativu biliaun $1,028, kompostu hosi kupaun no dividendu ne’ebé simu mak millaun $79,19, mudansa iha valór merkadu negativu biliaun -$1,089 no movimentu cambiais mak negativu millaun -$11,86 iha trimestre ne’e,” Vise-Governadór BCTL liuhosi nota ne’ebé Agência Tatoli asesu, segunda ne’e.
Notísia relevante: Kapitál Fundu Petrolíferu to’o 31 marsu atinje biliaun $19,12
Venâncio esplika, rezulta rendimentu ba karteira fundu durante trimestre ne’e -5,33%, enkuantu rendimentu sasukat ka benchmark nian ba períodu ne’e mak -5,61%.
“Lei Fundu Mina-Rai espesifika katak Jestór Operasionál mak hanesan ajente responsável ba jestaun operasionál fundu ina-rai nian. Ministériu Finansa mak responsabiliza atu estabelese estratejia investimentu tomak kona-ba fundu,” nia tenik.
BCTL jere ona portofóliu besik liu ho pontu referénsia iha trimestre dala-68 dahuluk. Diferensia entre retornu totál portofóliu no pontu referénsia iha períodu ne’e 28 ponto de base ou 0,28 %, dezempeña absoluta retornu fundu hahú hosi inísiu mak 4.14%.
Pontu importante hosi relatóriu trimestre ba da-LXIII, ne’ebé kobre períodu 01 abril to’o loron 30 juñu 2022, inklui kapitál fundu nian mak biliaun $17,84, osan kontadu brutu fundu nian tama hosi kontribuisaun kontribuinte, royalties hamutuk millaun $49,06.
Nune’e, osan kontadu líkuidu ne’ebé sai hosi fundu durante trimestre ne’e hamutuk millaun $303,52, kompostu hosi millaun $300 transfere ba Orsamentu Jerál Estadu no millaun $3,52 kobre kustu jestaun nian.
Rendimentu totál portofóliu fundu nian iha trimestre ne’e mak -5.33% enkuantu rendimentu sasukat ka benchmak iha períodu ne’e mak -5,61%. Rendimentu portofóliu instrumentu merkadu finanseiru iha períodu ne’e mak -5,59% kompara ho rendimentu referénsia mak -5,88%.
Jornalista : Antónia Gusmão
Editora : Julia Chatarina
