DILI, 08 agostu 2022 (TATOLI)—Ministériu Agrikultura no Peska (MAP) liuhosi Diresaun Nasional Irrigasaun, iha tinan 2022, konsege hadi’a ona irrigasaun haat hosi projetu irrigasaun ualu ne’ebé a’at, prevee iha verba kapitál dezenvolvimentu ministériu nian.
“Ita-nia projetu ualu ne’e, agora ita ezekuta ona haat hanesan irrigasaun Hali-foun, Bebui, Larisula, no Raibere, maibé haat seluk seidauk, maibé ita fó ona xamada ba kompañia na’in sira ne’ebé kaer projetu ne’e, atu molok ramata tinan ne’e tenke ramata ona serbisu tanba ita laiha orsamentu ne’ebé prevee ba tinan 2023,” Diretór Nasional Irrigasaun MAP, Martinho Laurentino Soares, informa ba Agência Tatoli, iha ninia knaar fatin, MAP, Comoro, segunda ne’e.
Projetu irrigasaun ualu ne’ebé MAP atu hadi’a, antes ne’e iha ona, balun konstrui permanente no balun tradisioál de’it.
“Hanesan ita hotu hatene, irrigasaun ne’ebé hetan estragu iha loron 04 abril 2021, mota estraga no tebe sai hotu, kanu, tohar, no rai halai, entaun presiza hadi’a no tau fali bronjon atu satán mota labele sobu,” nia akresenta.
Orsamentu ne’ebé prevee hodi hadi’a irrigasaun boot ualu ne’e hamutuk $1.613.435,59.
Laiha osan hadi’a irrigasaun Mota Manatuto
Iha sorin seluk, Diretór Nasionál Martinho Laurentino, hateten, daudaun ne’e MAP seidauk bele hadi’a irrigasaun mota Manatuto tanba seidauk iha orsamentu, maibé irrigasaun ne’e hetan apoiu hosi parseiru dezenvolvimentu Japan International Cooparation Agency (JICA) ne’ebé serbisu hamutuk ho Governu iha tinan 2000 to’o 2002.
“Manatuto ne’e iririgasaun barak, maibé irrigasaun boot iha Manatuto ne’e mak Welolo Domi, ne’ebé uluk Japaun mak halo iha 2000 to’o 2002 no inaugura iha tinan 2003, maibé hetan estagu totál hosi dezastre naturál iha loron 04 abril liubá, agora ita labele hadi’a fali tanba ami-nia diresaun ne’e agora seidauk iha osan ne’ebé sufisiente atu atende lalais ba situasaun ne’e,” nia tenik.
Notísia relevante: Komisaun E husu MAP halo atendimentu urjénsia ba irrigasaun Mota Manatuto
Diretór dehan, Deputadu komisaun E ne’ebé trata asuntu infraestrutura husu ba MAP atu hadi’a urjentemente, maibé agora seidauk bele tanba atu hadi’a ba intake irrigasaun mota Manatuto sei presiza forma ekipa no konsultór ruma atu haree didi’ak hodi hadi’a fali ba futuru.
“Tanba konstrusaun permanente ba irrigasaun Welolo Domi nian ne’e presiza estudu di’ak no orsamentu boot,” nia salienta.
Jornalista : Arminda Fonseca
Editora : Julia Chatarina
