COVALIMA, 08 agostu 2022 (TATOLI)–Diretór Apoiu Sosiedade Sivíl, Aguntinho Mendonça hateten, Organizasaun Noun Governametál (ONG) iha Covalima foku implementa programa área agrikultura no infraestrutura.
“Ita-haree sira-nia servisu hahú iha tinan 2000 to’o ohin loron, ita-nia ONG lokál iha Covalima hala’o servisu foku liu ba área agrikultura no área infraestrutura hanesan dada bee-moos no konstrui ponte kiik konstrui eskola tanba ne’e presiza atu hadi’a,” Agostinho Mendonça hateten ba jornalista sira hafoin halo enkontru ho membru ONG iha salaun Administrasaun Covalima, segunda ne’e.
Bazea ba fiskalizasaun iha terrenu katak ONG lokál eziste iha Covalima foku ba área agrikultura hanesan área hortikultura, hakiak ikan, animál no seluk tan.
Rezultadu fiskalizasaun hatudu katak, ho programa ne’ebé mak durante ONG sira hala’o iha Covalima maibé la hatudu nia rezultadu ne’ebé diak tanba laiha finalidade.
Ho nune’e, nia dehan, kona-ba infraestrutura Governu mós gasta osan hodi kondtrui eskola no ponte sira, tanba ne’e ba oin dirasaun Apoiu ONG fó hanoin makaas kuandu sira tama ona ba hala’o atividade agrikultura nian, sira tenke iha ninia sustentabilidade ba oin ne’e.
“Ohin, ha’u halibur ONG ho ita-nia parseiru sira-ne’ebé atu ajuda komunidade, tenke fó hanoin ba-sira, se sira kuda modo karik tenke iha finalidade, tenke hetan ninia rezultadu di’ak no iha kontinuidade. Ida-ne’e ami-nia servisu atu apoiu sira,” nia dehan.
Pontu vokál Raes Hadomi Timor-Oan (RHTO) Munisípiu Covalima, Rosito Amaral, aprezenta sira-nia servisu durante ne’e sira hala’o sensibilizasaun ba komunidade inkluzaun, defisiénsia no halo sensibilizsaun ba estudante no manorin sira kona-ba inkluzaun defisiénsia.
Aleinde hala’o sensibilizasaun, RHTO mós hala’o atividade hanesan ajuda fundu ba estudante sira-ne’ebé ho kondisaun defisiénsia, kada ema-ida RHTO apoiu orsamentu 75.00 tinan ida-dala ida.
RHTO mós servisu hamutuk ho Ministeriu Saúde hodi fo apoiu ba maluk defisiénsia hodi hasai atestadu médiku hodi asesu subsídiu no halo asesibilidade ba ema ho difisiénsia konstrui rampa, iha suku Matai, postu administrativu Maucatar no konstrui sintina ne’ebé ema ho defisiénsia bele asesu.
Jornalista : Celestina Teles
Editór : Cancio Ximenes
