DESPORTU, HEADLINE

PM Taur kongratula atleta timor-oan iha ASEAN Para Games 2022

PM Taur kongratula atleta timor-oan iha ASEAN Para Games 2022

Primeiru-Ministru, Taur Matan Ruak, Ministru Edukasaun Juventude no Desportu, Armindo Maia, no Sekretáriu Estadu Juventude no Deportu, Abrão Saldanha, hasai foto hamutuk ho atleta Paralímpiku, iha salaun PCM, Palásiu Governu, segunda (08/08). Imajen/GPM

DILI, 08 agostu 2022 (TATOLI)–Primeiru-Ministru (PM), Taur Matan Ruak kongratula atleta timor-oan ne’ebé partisipa iha eventu multi-desportivu hosi Asosiasaun Nasaun Sudeste Aziátiku (ASEAN) Para Games tinan 2022 ba da-XXI no konsege lori medalla 13 mai Timor-Leste.

“Ha’u kontente loos, ema dala barak dehan laiha buat ida iha mundu difisil, se ita hakarak to’o neneik iha ita-nia istória, ita hatudu katak mesmo mate ita la tauk ukun-an quanto mais ida ne’ebé ba moris, entaun tinan-20 naton ona para ita avansa ba etapa seluk, katak kompete la’ós partisipa, ho susesu sira ne’e orgullu ida ba Timor,” PM Taur hato’o sentimentu orgullu ne’e bainhira simu Atleta Paralímpiku, iha salaun Prezidénsia Konsellu Ministru (PCM, sigla portugés), Palásiu Governu, segunda ne’e.

Eventu ne’ebé realiza kada tinan rua ne’e, ba tinan ne’e realiza iha loron 30 jullu  to’o 06 agostu  2022 iha Solo, Indonézia.

Hosi medalla 13 ne’e Timor-Leste hetan, kompostu hosi osan-mean neen, osan mutin neen no osan metan ida.

Notísia relevante: Atleta Timor-Leste manán medalla 13 iha ASEAN Para Games 2022

Nune’e, Xefe Governu orgullu tebes ho prestasaun atleta timor-oan sira iha rai-li’ur no enkoraja atu hatudu prestasaun di’ak iha eventu sira tuir mai.

“Hakarak hato’o parabéns. Esperiénsia ida-ne’e hatudu katak ba oin sei hatudu maka’as liután, labele tun maibé tenki aumenta. Entaun esforsu fíziku, dedikasaun, no preparasaun psikolójiku imi-nia an ne’e maka’as liu no apoiu Governu mós tenki maka’as hodi kontribui kondisaun hotu atu prestasaun ne’e bele di’ak liután. Tanba ne’e, ha’u kontente loos simu imi iha fatin ne’e no lori VIII Governu, Estadu Timor no povu-nia naran saúda ita-boot sira,” PM subliña.

Xefe Ezekutivu ne’e konsidera atleta Paralímpiku nu’udár referénsia ba ema hotu no ezemplu ida ba atleta hotu hodi banati tuir.

“Imi-nia prestasaun hatudu rezultadu estraordinária no foin akontese iha VIII Governu nia mandatu. Ha’u la hatene, Sekretáriu Estadu Juventude no Deportu atu fó saida ba imi, maibé ha’u pesoál atu fó karau ida ba imi, tanba ha’u kontente loos,” PM promete.

Iha biban hanesan, Sekretáriu Estadu Juventude no Deportu, Abrão Saldanha, hateten, iha lei baze desportu no diploma ministeriál ne’ebé regula kona-ba atribuisaun prémiu ba atleta medalladu sira, hteten katak atu halo apresiasaun ne’e komisaun nasionál desportu ne’ebé reprezenta Estadu, organizasaun desportu no atleta sira-nia reprezentante.

“Ami sei halibur komisaun nasionál desportu depois simu tiha sira-nia relatóriu atu haree nível kompetisaun no númeru partisipante ne’ebé idaidak iha, nune’e bele distribui prémiu ne’ebé sira merese hetan, baze legál kobre sira-nia direitu no Estadu iha obrigasaun atu fó rekoñesimentu,” governante ne’e afirma.

Nia kompromete ho prestasaun sira ne’ebé atleta sira iha, ba oin sei dezenvolve di’ak liután.

“Agora ami hamutuk ho komite Paralímpiku atu halo rekrutamentu ba joven sira difesiénsia iha munisípiu sira, sé mak hakarak halo atividade desportu bele rejistu no ami buka dalan atu koko sira-nia nível difisiénsia, kategoriza sira no treina sira ho intensiva ho nune’e bele hetan prestasaun iha nasionál no internasionál,” Abrão dehan.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!