BOBONARO, EKONOMIA, HEADLINE, MUNISÍPIU

Governu presiza prioritiza estrada ligasaun Balibo-Batugade

Governu presiza prioritiza estrada ligasaun Balibo-Batugade

Estrada ligasaun hosi postu administrativu Balibo Vila ba suku Batugade. Imajen espesiál.

BOBONARO, 09 agostu 2022 (TATOLI) – Adiministradór postu administrativu Balibo, munisípiu Bobonaro, Procopio Caero, husu Governu Sentrál tau prioridade ba konstrusaun estrada ligasaun hosi Balibo Vila ba to’o suku Batugade ho distánsia kuaze kilómetru 12.

Nia dehan, estrada refere konstrui dezde okupasaun Indonézia no governu anteriór konsege ateru taka de’it rai-ku’ak hodi fasilita movimentasaun komunidade nian maibé agora kuaze aat totál.

Tuir nia, diresaun refere tama mós iha estrada protokolu entaun Governu tenke prioritiza tanba hosi postu administrativu Maliana konstrui hosi ponte Nunura to’o deit Balibo Vila, maibé ligasaun hosi suku Batugade to’o Balibo Vila to’o agora sei kontinua aat.

Notísia relevante: CAFI sei aprova estrada urbana Maliana ho kilómetru 23

“Ami preokupa tanba saida,ha’u sente estrada ida-ne’e mós hanesan estrada protokolu tanba mai liu munisípiu nian. Ida-ne’e mak ami ezije ba governu tau iha prioridade,” nia ko’alia iha iha salaun administrasaun munisípiu Bobonaro, tersa ne’e.

Procopio husu ona informasaun ba prezidente autoridade munisípiu Bobonaro ba estrada refere, maibé dehan governu seidauk tau iha planu prioridade atu responde iha tinan ne’e.

“Ita dalaruma bele sente ho liafuan seluk triste uitoan, bainhira ema hosi nasaun viziñu Indonézia mai hare estrada nasaun ida mak kondisaun hanesan mós ladún di’ak, ida-ne’e mak ita hotu hanesan sidadaun sente presiza tau duni iha prioridade,” nia fó hanoin.

Tuir dadus monografia 2021 postu administrativu Balibo iha aldeia 27, suku neen  mak hanesan Sanirin, Cowa, Leo-lima, Leo-hitu, Balibo Vila no Batugade ho totál populasaun 19,869 no totál uma-kain 4,708.

Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!