DILI, 09 agostu 2022 (TATOLI)—Ministériu Turizmu Komérsiu no Indústria (MTKI) nu’udar ministériu implementadór halo ona distribuisaun Cesta Bázika faze daruak rejista reklamante 6.512 iha suku haat.
Suku haat ne’e mak hanesan Comoro iha munsípiu Dili, Poetete iha munisípiu Ermera, Ritabou iha munisípiu Bobonaro no Dato iha munisípiu Liquiçá.
“MTKI distribui ona iha suku haat hamutuk 43.673 ho 5,91%, maibé abitante ne’ebé seidauk simu produtu Cesta Básika hamutuk 695.839, ne’ebé tuir despaixu MTKI responsabiliza distribuisaun iha munisípiu Dili, Ermera, Bobonaro, Liquiçá, Ataúro no Pante Makasar – Rejiaun Administrativa Espesiál Oé-cusse Ambeno (RAEOA),” refere nota ne’ebé Agência Tatoli asesu, tersa ne’e.
Notísia relevante: MTKI konklui ona distribuisaun Cesta Bázika ba benefisiáriu 19.478
Tuir dadus, iha suku Comoro aldeia neen iha reklamante 3.261, suku Poetete aldeia 12 iha reklamante 1.040, suku Dato iha reklamante 1.189, no suku Ritabou iha reklamante 1.022, nune’e dadus reklamante provizóriu hosi suku haat hamutuk 6.512 mak seidauk simu direitu.
“Hosi dadus ne’e, iha suku rua hosi aldeia ida ne’ebé pertense iha suku Comoro no aldeia ida iha suku Dato mak seidauk submete lista reklamante. Tanba ne’e, ekipa traballu ba apoiu distribuisaun no ezekusaun programa Cesta Bázika Ministériu Turizmu Komérsiu no Indústria sei hein hela dadus hosi aldeia rua ne’e hodi prosesa distribuisaun ba komunidade ne’ebé iha ona lista reklamasaun,” nota ne’e esplika.
Nune’e, MTKI serbisu maka’as hela hodi halo verifikasaun ba empreza 90 tuir kategória klase A, B no C, ne’ebé tuir kalendáriu preparadu hosi sekretariadu no prosesu distribuisaun sei la’o iha fatin barak.
Antes ne’e, Governu liuhosi reuniaun Konsellu Ministru, aprova ho alterasaun, medida distribuisaun Cesta Bázika ba família timor-oan sira ne’ebé presiza liu no apoiu operadór ekonómiku lokál bele kria rejime espesiál kona-ba aprovizionamentu, iha ámbitu planu rekuperasaun ekonómiku.
Ho projetu Dekretu-Lei ne’e, Governu hakarak kontinua fó produtu nesesidade dahuluk no garante sustentabilidade família, ne’ebé iha tempu hanesan atu kria kondisaun normalidade ba atividade produtór no operadór ekonómiku nasionál sira tanba prokura menus.
Ministériu implementadór ba Cesta Bázika faze daruak ne’e maka MTKI ho totál kustu millaun $40 no Sekretaria Estadu Kooperativa (SEKoop) ho totál kustu millaun $40.
Produtu ne’ebé admite ba programa ne’e mak hanesan produtu ai-han ne’ebé iha karboidratu, proteína no vitamina inklui sasán ijiene pesoál no ijiene fememinina.
Cesta Bázika faze ne’e fixa ho montante $50 ba kada ema hosi membru agregadu familiár benefisiáriu ne’ebé ho rendimentu mensál boot liu $500, enkuatu antes ne’e sidadaun iha territóriu laran sai benefisiáriu hotu ba Cesta Bázika faze dahuluk.
Jornalista : Arminda Fonseca
Editora : Julia Chatarina
