VIQUEQUE, 09 agostu 2022 (TATOLI)—Truck ida ho xapa matríkula 60.606, ne’ebé halo movimentu mobiliza materiál konstrusaun estrada, hetan asidente iha Buanurak postu administrativu Ossu, munisípiu Viqueque maizumenus tuku 11:00 dadeer, tersa ne’e, rezulta traballadór tolu kanek.
“Traballadór na’in-tolu ne’ebé hetan asidente daudaun halo hela tratamentu iha ospitál intermentu Viqueque,” Komandante Tránzitu munisípiu Viqueque, Salvador Guterres, hateten ba Agência Tatoli, iha ninia knaar fatin, tersa ne’e.
Notísia relevante: Ema na’in-rua mate tanba asidente tráfegu no na’in-rua tara-aan
Komadante Tránzitu haktuir, ema na’in-tolu ne’e inklui ona ho kondutór ema Filipina ne’ebé hetan kanek iha ulun.
“Médiku sira iha internamentu daudaun halo hela tratamentu no ami lori ona kareta ne’ebé ohin hetan asidente mai edifísiu Polísia Nasionál Timor-Leste (PNTL) munisípiu Viqueque,” nia akresenta.
Tuir nia, asidente ne’e kuaza hosi kondutór halai lansadu hafoin trava iha kurva la biban.
“Truck ne’e sira halai lansadu, to’o iha dalan kurva, ninia kondutór atu trava la biban nune’e kareta soe-an no baku fila hodi rezulta na’in tolu hetan kanek. Karreta ne’e kompañia xinez nian, ne’ebé kaer projetu konstrusaun estrada hosi postu Ossu liga mai Viqueque vila,” nia dehan.
Jornalista : Vitorino Lopes da Costa
Editora : Julia Chatarina
