Governu hato’o solidariedade ba Koreia Súl
DILI, 10 agostu 2022 (TATOLI)—Governu Timor-Leste hato’o solidaridade ba Koreia Súl, relasiona ho udan boot to’o akontese inundasaun iha kapitál Seoul, segunda (08/08), hodi rezulta ema barak mak mate no estraga sasán barak.
“Lori povu Timor-Leste nia naran, Governu hato’o kondolénsia ba família no belun vítima inundasaun ne’ebé kauza hosi udan forte liu iha Seoul, hanesan akontese iha tinan-80 liubá,” Ministru Prezidénsia Konsellu Ministru no Portavoz Governu, Fidelis Manuel Leite Magalhães, hato’o sentimentu solidariedade liuhosi nota ne’ebé Agência Tatoli asesu, kuarta ne’e.
Notísia relevante: Governu desloka tan traballdór 110 bá serbisu iha Koreia Súl
Durante segunda kalan boot, oras lokál, udan komesa boot iha Seoul no iha sidade viziña sira, nune’e rezulta ema na’in-ualu mate no ema atus ba atus tenke evakua.
Udan maka’as estraga materiál barak hanesan edifísiu, veíkulu, estrada no infraestrutura sira seluk, hodi provoka mós rai-halai no obriga tenke taka ahi elétriku no suspende servisu komboiu no metru nian.
“Ami-nia sentidu kondolénsia kle’an ba família sira ne’ebé lakon sira-nia ema ne’ebé sira hadomi. Iha loron difisil ne’e, Timor-Leste hato’o ninia solidariedade ba Governu no populasaun Repúblika Koreia,” Portavoz Governu tenik.
Jornalista : Antónia Gusmão
Editora : Julia Chatarina
