HEADLINE, MUNISÍPIU, VIQUEQUE

Idozu na’in-500 iha suku Afaloikai simu ona subsídiu

Idozu na’in-500 iha suku Afaloikai simu ona subsídiu

Xefe suku Afaloikai, Constantino Guterres. Imajen Tatoli/Vitorino Lopes da Costa

VIQUEQUE, 10 agostu 2022 (TATOLI)—Banku Nasionál Komérsiu Timor-Leste (BNCTL, sigla portugés) halo ona pagamentu subsídiu ba idozu na’in-500 iha suku Afaloikai, postu administrativu Uatulari, munisípiu Viqueque.

“Dadus benefisiáriu suku Afaloikai hosi aldeia 10 ho totál hamutuk na’in-500, dadus inválidu na’in-200. Dadus benefisiáriu idozu foun hosi suku Afaloikai hamutuk na’in-40 maka ha’u aprezenta ona, maibé difikuldade maka laiha dokumentu Billete Identidade no Sertidaun Nasimentu, nune’e Ministériu Solidaridade Sosial no Inkluzaun (MSSI) haruka fila benefisiáriu sira-nia dokumentu mai ha’u,” Xefe suku Afaloikai, Constantino Guterres, hateten ba postu Polísia Afaloikai, kuarta ne’e.

Notísia relevante: INSS sei aplika BI ba pagamentu idozu-invalidéz iha 2023

Nune’e, nia husu Ministériu Administrasaun Estatál (MAE), Ministériu Justisa (MJ) no MSSI hodi halo kooperasaun forma ekipa konjuta hodi to’o iha baze hodi trata komunidade nia dokumentu.

“Ita-nia inan-aman sira-ne’e ba halo sira-nia dokumentu to’o iha munisípiu difisil tebes. Tanba ne’e, ha’u husu ministériu relevante sira mai suku hodi trata komunidade sira-nia dokumentu tanba maioria komunidade maka hela iha área rurál. Ami simu informasaun katak novembru idozu sira simu sira-nia direitu tenku uza dokumentu Billete Identidade no Sertidaun Nasimentu, maibé ha’u haree kuaze idozu hosi suku Aloikai barak mak seidauk iha dokumentu,” nia akresenta.

Iha fatin hanesan, Benefisiáriu subsídiu, Manuel Magalhães, hateten, Governu forma ona ekipa ida hodi mai suku trata dokumentu nune’e idozu sira bele asesu.

“Ami bá Viqueque maka trata dokumentu ne’e susar tanba ami la’o mós labele ona. Bainhira ami ba notariadu Viqueque maka trata ami-nia dokumentu ne’e, ha’u sente susar tanba ami-nia maluk barak maka hela liu área rurál,” nia tenik.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!