DILI, 10 agostu 2022 (TATOLI)–Ministériu Edukasaun Juventude no Desportu (MEJD) deside sei halo distribuisaun karteira eskolár 20.000 ba eskola sira iha tinan ne’e.
“Karteira eskolár 20.000 ne’ebé ita prepara ona ba fulan-tolu mai mak foin bele halo distribuisaun tanba agora ita seidauk monta hotu,” Ministru Edukasaun Juventude no Desportu, Armindo Maia, informa iha Palásiu Governu, kuarta ne’e.
Ministru dehan, kadeira no meza sira ne’ebé seidauk monta, bainhira iha ona planu atu halo distribuisaun maka lori ba monta dala ida iha fatin ka eskola sira tanba mobiliáriu sira ne’ebé Governu sosa hosi Indonézia.
Notísia relevante: Estudante ESJ Finantil balun laiha karteira eskolár partisipa ezame períodu daruak
Daudaun karteira eskolár sira iha ona armazen MEJD no parte ministériu iha ona lista eskola sira ne’ebé sai prioridade atu hetan distribuisaun.
Nune’e, Ministru garante katak ba oin fasilidade sala aula sei sifisiente ba estudante sira no bele utiliza hodi partisipa iha prosesu aprendizajen nia laran.
Maski nune’e, MEJD sei preokupa hela ho tetu Orsamentu Jerál Estadu (OJE) 2023 tanba ne’e maka mosu desizaun ida hodi adia lai prosesu distribuisaun ne’e.
Jornalista : Tomé Amado
Editora : Julia Chatarina
