DILI, 10 agostu 2022 (TATOLI)–Ministériu Ensinu Superiór Siénsia no Kultura (MESSK) posibilidade sei halo ezersísiu hodi prepara orsamentu atu apoiu estudante timor-oan hamutuk na’in-126 ne’ebé sei kontinua sira-nia estudu iha nasaun Repúblika Popular Xina.
Ministru Ensinu Superiór Siénsia no Kultura, Longuinhos dos Santos, relata, MESSK no Ministériu Finansa (MF) sei haree kestaun ne’e tanba dekretu-lei ne’ebé hanesan baze legál ba apoiu ne’e hetan ona promulgasaun hosi Prezidente Repúblika.
“Ohin Primeiru-Ministru informa ona mai ha’u no Ministru Finansa katak dekretu-lei kona-ba atu apoiu fundu ba estudante timor-oan sira atu kontinua estuda iha Xina hetan ona promulgasaun hosi Xefe Estadu,” Ministru informa iha Palásiu Governu, kuarta ne’e.
Notísia relevante: Governu apoiu dezlokasaun estudante timor-oan iha estranjeiru bainhira enfrenta situasaun grave
Ministru dehan, estudante sira presiza halo kompletu dokumentu sira molok dezloka ba Xina.
Tuir governante ne’e, númeru ne’ebé nia simu hosi ekipa ministériu, katak iha totál estudante 126 maka sei ba kontinua estudu. Tanba ne’e, nia sujere ba estudante sira tenke submete lalais dokumentu atubele prepara orsamentu.
“Ha’u sei ko’alia ho ha’u-nia ekipa téknika sira atu halo preparasaun hodi nune’e bele informa ona ba Fundu Dezenvolvimentu Kapitál Umanu (FDCH, sigla portugés) atubele prepara orsamentu,” nia akresenta.
Bainhira MESSK halo ezersísiu ba orsamentu ne’e maka la sufisiente atu apoiu estudante sira, maka sei halo koordenasaun ho MF hodi bele hetan liu apoiu fundu.
“Totál orsamentu atu apoiu estudante timor-oan ba eskola iha Xina ne’e sei iha hela ezersísiu nia laran bazeia ba númeru estudante ne’ebé iha,” nia tenik
Jornalista : Tomé Amado
Editora : Julia Chatarina
