DILI, 13 jullu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei, kona-ba medida apoiu dezlokasaun estudante timor-oan iha ensinu superiór estranjeiru hodi filafali mai Timor-Leste ka hodi sai ba estranjeiru iha situasaun pandemia, epidemia, dezastre naturál ka katástrofe, moras todan ka konflitu armadu.
Projetu dekretu-lei ne’e aprezenta hosi Ministru Ensinu Superiór, Siénsia no Kultura (MESSK), Longuinhos dos Santos.
“Ho aprovasaun diploma ida-ne’e, haree ba situasaun sira ne’ebé akontese, Estadu sei fasilita estudante sira-nia viajen hodi estudante ho nasionalidade timor-oan ne’ebé ativa frekuente hela ensinu superiór iha estranjeiru iha instituisaun ensinu superiór ne’ebé hetan akreditasaun bele fila mai Timor-Leste, ka sai ba fatin ne’ebé sira sei frekuente sira-nia estudu iha ensinu superiór,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.
Notísia relevante: Bolseiru timor-oan 130 husu PR fasilita sira fila ba Xina
Nune’e, Estadu sei selu viajen liuhosi transporte aéreu, marítimu ka rodoviáriu ba estudante durante ninia dezlokasaun filafali ka sai hosi timor-Leste inklui alojamentu ka hela temporária iha evakuasaun, kuarantena, realizasaun tratamentu médiku ka ospitál.
Antes ne’e, iha bolseiru timor-oan hamutuk 130 ne’ebé halo estudu iha Xina mak fila mai Timor-Leste ho razaun halo renovasaun ba pasaporte, balun pasa férias no razaun seluk tan, maibé tanba kondisaun COVID-19 iha Xina, halo estudante hirak ne’e la konsege fila ba Xina to’o agora.
Tanba ne’e, bainhira atu fila kontinua estudu iha Xina, sira husu ba Estadu hodi apoiu billete no kuarentena ba sira.
Iha biban hanesan, Ministru Ensinu Superiór Siénsia no Kultura (MESSK), Longuinhos dos Santos, hateten, dekretu-lei ne’e nu’udar forsa ida atu loke oportunidade ba estudante sira atu hetan apoiu fundu hosi Governu hodi bele kontinua estudu iha nasaun Xina, tanba estudante sira ne’e fila mai Timor Leste iha situasaun pandemia COVID-19 maibé to’o ohin loron la konsege filafali ba kontinua sira-nia estudu tanba hasoru difikuldade ho fundu ba kuarentena.
Ho hanoin ida-ne’e maka MESSK hamosu dekretu-lei ne’e atu garante bainhira iha timor-oan balun halo estudu iha rai-li’ur no hasoru difikuldade hanesan impaktu pandemia, epidemia, forsa konflitu funu internasionál inklui moras tan, bele hetan garantia fundu ba estudu.
“Hosi totál estudante 120 ne’ebé eskola iha nasaun Xina, na’in-17 posibilidade sei dezloka uluk hodi ba kontinua estudu. Tanba ne’e, Governu sei aloka orsamentu liuhosi fundu dezenvolvimentu kapitál umanu bazeia ba proposta estudante sira ne’e sei prevee $300.000, ne’ebé bainhira la to’o maka MESSK sei husu apoiu tan hosi Ministériu Finansa (MF) atu tau tan orsamentu hodi apoiu estudante sira, karik sira dezloka duni ba Xina,” nia dehan.
Enkuantu, dekretu-lei ne’ebé MESSK kria ne’e bazeia ba pedidu estudante sira, maibé MESSK sei kria tan diploma ministeriál ida atubele regulariza bazeandu ba rejime jurídiku, ne’ebé atu koloka orsamentu hodi apoiu estudante sira ba estuda iha rai li’ur ne’e Governu hein de’it kuandu dekretu-lei ne’e promulga ona.
Jornalista : Antónia Gusmão/Tomé Amado
Editora : Julia Chatarina
