DILI, 11 agostu 2022 (TATOLI)–Prezidente Konsellu Administrasaun Instituisaun Nasionál Seguransa Sosiál (INSS), Longuinhos Armando Leite, informa idozu no invalidéz sira-ne’ebé mate hosi tinan 2020-2022 ne’e INSS simu informsaun no rejista hamutuk 2.078.
Notísia Relevante: PM Taur lansa pagamentu subsídiu $50 ba idozu iha Liquiça
“Idozu ne’ebé mate hosi tinan 2020-2022 hamutuk 1.996 no invalidéz ne’ebé mate hamutuk na’in-82 ho nia totál hamutuk 2.078,” Longuinhos Armando Leite hateten ba Agência Tatoli, liuhosi WhatsApp, kinta ne’e.
Bainhira ferik ka katuas ida mate, purezemplu mate iha faze dahuluk 2022 nian mak nia sei iha dereitu atu hetan ka simu iha faze daruak tinan 2022. Maibé bainhira tama ba tinan oin mak família sei laiha tan direitu ba simu subsídiu ne’e.
Alterasaun dahuluk ba Dekretu-Lei nú. 17/2017, loron 24 fulan-maiu, no ba Dekretu-Lei nú. 19/2017, loron 24 fulan-maiu, ne’ebé aprova rejime jurídiku kona-ba Pensaun Invalidéz no Ferik-katuas no rejime jurídiku hosi prestasaun bainhira ema mate iha ámbitu rejime kontributivu seguransa sosiál nian.
Projetu Dekretu-Lei ida-ne’e ninia objetivu mak:
- Garante prinsípiu báziku ba rejime kontributivu, ne’ebé relasiona ho dever atu kontribui ba direitu hodi simu prestasaun sosiál sira;
- Regula fórmula kálkulu nian kona-ba pensaun invalidéz no ferik-katuas ba traballadór sira ne’ebé parsialmente abranje husi rejime tranzitóriu (ho direitu iha formasaun);
Asegura katak ema-ne’ebé kontribui ba rejime jerál ne’e sei nafatin hetan direitu ba pensaun ne’ebé boot liuhosi valór Subsídiu Apoiu ba Ferik-Katuas no Inválidu sira; no Klarifika tratamentu ne’ebé atu fó bainhira deskonfia ema ne’e mate (morte presumida) atu iha efeitu ba Seguransa Sosiál.
Alterasaun dahuluk ba Dekretu-Lei nú. 19/2008, loron 19 fulan-juñu, ne’ebé aprova Subsídiu Apoiu ba Idozu no Inválidu sira, ho konsiderasaun katak bainhira diploma legál ne’ebé refere tiha ona tama iha vigór, seidauk kria rejime seguransa sosiál seluk iha Timor-Leste no haree ba rejime kontributivu seguransa sosiál ne’ebé kria ona.
Jornalista : Osória Marques
Editór : Cancio Xiemenes
