HEADLINE, MUNISÍPIU, OÉ-CUSSE (RAEOA), POLÍTIKA

Arsénio Bano enkoraja funsionáriu RAEOA dezempeña serbisu ho responsabilidade no disiplina

Arsénio Bano enkoraja funsionáriu RAEOA dezempeña serbisu ho responsabilidade no disiplina

Prezidente Autoridade RAEOA, Arsénio Paixão Bano. Imajen Tatoli/Francisco Sony.

OÉ-CUSSE, 11 agostu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, enkoraja funsionáriu sira iha Oé-Cusse atu dezempeña serbisu ho responsabilidade no disiplina iha serbisu fatin.

“Ita tenke hatudu disiplina iha serbisu fatin tuir lei funsaun públika hatete, labele mai tarde, labele fila sedu, tenke respeita instituisaun Estadu, tanba fatin ne’e halo serbisu ba povu, na’in mak povu, tán ne’e husu apoiu hodi imi-nia dezempeñu hala’o kna’ar ho di’ak, kuandu ita serbisu ho laran, povu mós serbisu ho laran,” Arsénio Paixão Bano, halo diskursu aberta sensibilizasaun lei anti brankamentu kapitál iha Oé-Cusse, kuarta ne’e.

Nia afirma, dezenvolvimentu atu la’o, persiza serbisu koletiva, book-aan mós tenke lalais, serbisu ne’e badinas, la persiza hein malu, tanba rai ne’e atu ba oin tenke serbisu maka’as.

“Dalaruma ha’u ba to’o postu saúde doutor balu mai tarde no la tama serbisu kuaze fulan ida, ita ba to’o eskola, mestre balu la tama serbisu kuaze semana rua to’o tolu, ita haree empreza balu simu tiha projetu balu la’o neineik liu, ne’e hahalok, nasaun selu ita atu serbisu ba povu. Rai ne’e selu ita atu serbisu halo rai ne’e ba oin, ita ba sede suku, xefe suku laiha, iha halo dezenvolvimentu iha suku to’o tempu inaugurasaun, xefe suku lakohi partisipa, ne’e hahalok,” nia afirma.

Tuir nia haree, produtu barak importa ba Dili, no balu tama hosi fronteira terrestre hosi nasaun viziñu.

Nia espera xefe suku sira servisu hamutuk ho autoridade RAEOA hodi enkoraja komunidade atu halo serbisu maka’as iha baze hodi kontribui ba prosesu dezenvolvimentu.

Notísia relevante: UIF selebra ona akordu ho organizasaun rejionál 22 kombate krime brankamentu kapitál

Jornalista : Abílio Elo Nini
Editór : Evaristo Soares Martins

iklan
iklan

Leave a Reply

iklan
error: Content is protected !!