iklan

EDUKASAUN, HEADLINE

Estudante 13 iha Eskola ESJ 05 maiu hetan TIR

Estudante 13 iha Eskola ESJ 05 maiu hetan TIR

Diretór Eskola Ensinu Sekundáriu Jerál 05 maiu, Becora, Manuel Verdiál. Imajen Tatoli/Egas Cristóvão

DILI, 11 agostu 2022 (TATOLI)–Estudante 13 iha Eskola Ensinu Sekundáriu Jerál (ESJ) 05 maiu Becora hetan notifikasaun ba Termu Identidade Rezidénsia (TIR) tanba identifika envolve iha kazu tuda malu entre eskola iha área Becora semana kotuk.

Diretór Eskola ESJ 05 maiu, Manuel Verdial, relata, estudante ne’ebé hetan identifikasaun hosi Polísia Nasionál Timor-Leste (PNTL) Eskuadra Becora, bazeia ba saida mak CCTV identifika hatudu hamutuk na’in-15, maibé hafoin submete ba primeiru interrogatóriu, na’in-rua livre hosi desizaun Tribunál.

“Ita iha estudante hamutuk na’in-13 mak hetan uluk kapturasaun iha momentu konfrontasaun entre estudante eskola 12 novembru no 05 maiu Becora, hafoin maka Polísia sira identifika tan ita-nia estudante na’in-rua, ne’ebé hamutuk na’in-15,” Diretór eskola informa ba Agência Tatoli, iha Becora, kinta ne’e.

Notísia relevante: Estudante ESJ 05 maiu na’in-hitu la tuir ezame períodu daruak

Maski nune’e, estudante sira la konsege hetan notifikasaun hosi Tribunál tanba sira na’in-rua la envolve iha asaun tuda malu ne’e.

“Sira na’in-rua kontinua tuir filafali ezame períodu daruak iha loron daruak,” nia akresenta.

Nune’e, estudante ne’ebé hetan TIR tenke halo aprezentasaun períodika kada fulan dala-ida iha Polísia tuir área Eskuadra ne’ebé estabelese no desizaun ne’ebé maka Tribunál Distritál Dili (TDD) foti katak estudante na’in-13 ne’e durante iha TIR tenke halo aprezentasaun períodika ne’e no labele envolve kazu saida de’it inklui labele sai hosi territóriu Timor-Leste to’o prosesu ramata.

Enkuantu, parte eskola rasik kontinua hein hela estudante na’in-13 ninia prezensa atu mai kompleta sira-nia ezame períodu daruak.

“Tanba ho kazu ne’ebé akontese sira lakon tiha direitu hamutuk ho estudante sira seluk iha ezame nia laran. Ami hein hela sira-nia prezensa. Tanba ne’e sira-nia direitu, tempu tempu saida de’it maka sira mai eskola prontu fó ezame ba sira,” nia tenik.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!