VIQUEQUE, 11 agostu 2022 (TATOLI)-–Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál, Falur Rate Laek, kinta ne’e, inaugura monumentu levantamentu 1983 iha aldeia Buanurak, suku Uabubo, postu administrativu Ossu, munisípiu Viqueque.
“Memoria rezisténsia levantamentu 11 agostu 1983, antes ne’e ami halo uluk ona iha área Luiunho kona-ba rekuperasaun memória nian, tanba hanesan pakote hosi levantentu 1983 nian ne’ebé akontese iha Viqueque. Iha fatin ida-ne’e maka ami halo kladestina ho komandu sira iha ai-laran hodi homosu levantamentu,” Falur Rate Laek hateten hafoin serimónia inaugurasaun, iha aldeia Buanurak, kinta ne’e.
Notísia relevante: Governu hatuur fatuk dahuluk ba monumentu Proklamadór Francisco Xavier iha Turiskai
Konstrusaun monumentu ne’e ho objetivu dignifika vítima sira ne’ebé envolve no sai memória ba jerasaun foun sira hodi hatene istória funu libertasaun Timor-Leste.
“Ami halo monumentu ida-ne’e hodi reprezenta levantamentu 08 agostu 1983. Hosi monomentu ida-ne’e ita dignifika mós feto sira ne’ebé uluk sofre iha okupasaun militár Indonésia sira. Ida-ne’e faze dahuluk nian, enkuantu faze daruak sei halo tan fatin memória iha área Bunurak,” nia akresenta.
Konstrusaun monumentu hosi inisiativa Tenente Jenerál Falur Rate Laek hamutuk ho veteranu no organizasaun rezisténsia sira, ne’ebé iha monumentu ne’e hakerek “Karik hahoris de’it feto, husik sira halo tuir sira-nia hakarak. Tamba hahoris mós mane, ita tenki funu! Sei to’o tempu ida, halibur, hakasolok, no haluha buat hotu”.
Monumentu ne’e konstrui hosi komunidade Buanurak iha estrada públiku oin, dalan liga bá munisípiu Viqueque no hahú konstrusaun iha fulan-jullu no finaliza iha agostu 2022, ho orsamentu $4.000 hosi fundu Tenente Jenerál Falur Rate Laek, veteranu sira no organizasaun rezisténsia sira.
Serimónia ne’e partisipa hosi autoridade lokál munisípiu Viqueque, veteranu no komunidade.
Jornalista : Vitorino Lopes da Costa
Editora : Julia Chatarina
