DILI, 11 agostu 2022 (TATOLI)–Governu liuhosi Ministériu Turizmu, Komérsiu no Indústria (MTKI) aloka orsamentu $40.000 hodi promove feira fim de semana iha Cristo Rei hodi promove gastronomia, artesanatu, poezia no kantora sira.
Diretór Nasionál Empreendimentu Atividade no Produtu Turíztiku, Júlio Ximenes Ribeiro, hateten objetivu atividade ne’e hodi halo promosaun ba atrasaun turístika iha Cristo Rei hodi dada vizitante nasionál no internasionál.
“Governu prevee orsamentu $40.000 ba atividade feira fim semana ne’e durante fulan-rua, hahú agostu to’o setembru 2022, oinsá ajuda negosiante sira hodi hetan rendimentu atu sustenta sira-nia família. Feira ne’e rasik sei hahú aban tuku 18:00 lorokraik iha Cristo Rei,” Diretór hateten iha konferénsia imprensa iha Sentru Konvensaun Dili, kinta ne’e.
Notísia relevante: Prezidénsia Repúblika realiza feira livru “O Livro é uma Janela para o Mundo”
Governu iha ona koordenasaun ho Autoridade Munisípiu Dili hodi prepara kondisaun infraestrutura bázika iha fatin feira ne’e rasik atu negosiante no vizitante sira bele uza.
Iha fatin hanesan, Eis Diretora Nasionál Empreendementu Atividade no Produtu Turístiku, Ernestina Lopes, hateten, negosiante 100 mak sei partisipa iha feira ne’e.
Koordenadora Jerál Grupu Dame Karleti no vendedora hosi munisípiu Liquiçá, Maria da Costa Cabral, informa, sira-nia grupu kompostu hosi ema na’in-15 ne’ebé sei aprezenta produtu kreatividade hosi akaditu-tahan ne’ebé halo hanesan lafatik, sakola no seluk tan.
“Ami partisipa feira dala-barak ona, ida-ne’e ajuda tebes ami hodi mellora ami-nia ekonomia família, tanba feto sira iha poténsia hodi kria auto-empregu hodi muda família nia moris,” nia tenik.
Jornalista : Arminda Fonseca
Editora : Julia Chatarina
