EKONOMIA, HEADLINE, MUNISÍPIU, VIQUEQUE

Kooperativa Kréditu Tane Malu Viqueque hahú prodús mina-sona

Kooperativa Kréditu Tane Malu Viqueque hahú prodús mina-sona

Kooperativa Kréditu Tane Malu prodús mina sona, iha iha aldeia Naeboruk, kinta (11/08). Imajen Tatoli/Vitorino Lopes da Costa

VIQUEQUE, 11 agostu 2022 (TATOLI)–Kooperativa Kréditu Tane Malu (KKTM) hahú prodús mina-sona ho matéria prima mina-nuu lokál, iha aldeia Naeboruk, suku Uma-uain Kraik, postu Viqueque vila, munisípiu Viqueque, no liuhosi produsaun ne’e hetan apoiu hosi parseiru Adra hodi fa’an ba konsumidór.

“Ami hetan formasaun hosi ONG Golp no parseiru Adra, ne’ebé ramata iha fevereiru 2022 no ami hahú halo produsaun mina-nuu. Formasaun ramata ami  hahú prodús mina-nuu ho marka Minuvi, ho materiál produsaun mak hanesan ailia, senoura no nuu-maran. Grupu kooperativa fa’an nuu fuan ida ba KKTM ho presu $0,10,” Koordenadora KKTM, Jelaurina Nunes Fernandes, hateten iha sede kooperativa, Naeboruk, kinta ne’e.

KKTM hahú produsaun iha maiu 2022 to’o agora iha sede Naeboruk no kontinua halo produsaun mina litru 235 maka fa’an fali ba konsumidór sira.

“Kada loron ami prodús litru 20, nune’e ohin loron ami hatama ona ba kompañia ida iha Metinaro, kada jerigen litru lima fa’an ho folin $10,50, haruka mós jerigen 25 ba loja Leadear no loja Agrikultura iha Dili, iha fulan-agostu ne’e,” nia akresenta.

Notísia relevante: Souru Coconut Oil prepara mina-nuu botir 800.000 ba Cesta Bázika

Nia dehan,  konsumidór sira fó hanoin ba KKTM katak mina ne’ebé prodús di’ak ona, maibé presiza halo lakon mina nia iis.

“Durante ne’e konsumidór sira satisfaz ona ho produtu mina ne’ebé ami prodús no sira fó hanoin mai ami, tenke halo lakon mina nia iis sai hanesan mina Bimoli, tanba mina ne’e ema prodús hosi nuu Macau, nune’e ninia iis la hanesan ho ita-nia nuu lokál. Ami esforsu ona uza materiál prima barak hodi  halo lakon mina nia iis, maibé susar halakon,” Koordenadora haktuir.

Maski nune’e, KKTM sei esforsu hodi haboot liután produsaun mina-nuu tanba konsumidór sira presiza barak.

“KKTM sei prodús barak liután bainhira programa Cesta Bázika tama Viqueque. Ami sente nuu ne’ebé moris iha Viqueque sei garante produsaun mina-nuu ne’ebé daudaun ami prodús tanba ami mós kolabora ona ho grupu kooperativa 10 iha munisípiu Viqueque hodi distribui nuu ba ami,” nia realsa.

Koordenadora otimista kontinua motiva membru sira hodi prodús mina halo barak hodi redús importasaun mina tanba durante ne’e komunidade konsumu mina maioria hosi rai-li’ur. Tanba ne’e KKTM prodús produtu lokál.

Membru kooperativa ne’ebé serbisu prodús mina-nuu hamutuk na’in-40 no rezultadu produsaun mina-nuu durante  ne’e hosi maiu to’o agostu hetan ona rendimentu $754,50.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!