iklan

EDUKASAUN, HEADLINE

MEJD konsidera jornada atinje kualidade edukasaun iha Timor-Leste sei naruk

MEJD konsidera jornada atinje kualidade edukasaun iha Timor-Leste sei naruk

Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 11 agostu 2022 (TATOLI)—Ministériu Edukasaun Juventude no Deportu (MEJD), kinta ne’e, realiza simeira nasionál kona-ba transformasaun edukasaun iha Timor-Leste.

Biban ne’e, Ministru Edukasaun Juventude no Desportu, Armindo Maia, konsidera Timor-Leste ninia jornada atu atinje kualidade edukasaun sei naruk.

“Ita-nia jornada atu atinje kualidade edukasaun sei naruk no ita-nia asesu ba edukasaun pre-eskolár foin mak iha de’it cerca de 30%, signifika ita hela de’it tinan-ualu atu atinje 80% hosi ita-nia Planu Estratéjiku Nasionál (PEN) iha tinan 2030,” Ministru hateten iha simeira nasionál, iha salaun city 8, Manleuana, Has-laran.

Aleinde ne’e, rasiu repetisaun eskola a’as tebes iha síkulu dahuluk no daruak ensinu báziku nian, hanesan fatór ne’ebé kontribui maka’as ba abandona eskolár no hatudu metade labarik no defisiénsia sira entre tinan 3 to’o 18 la eskola.

Iha tinan 2017, bainhira MEJD halo estudu ida, hatudu katak kuaze 31% estudante sira labele identifika liafuan ida bainhira ramata klase rua segundu anu iha ensinu báziku, ho ida-ne’e kategoria estudante 70% iha klase ida maka hetan valór zero ho prosesu lee testu sira.

Notísia relevante: MEJD sei distribui karteira eskolár 20.000 ba eskola sira tinan ne’e

Ho nune’e, prosesu ensinu aprendizajen ba labarik sira atu asesu edukasaun seidauk hanesan entre grupu ekonomia di’ak ho grupu seluk ne’ebé ladún di’ak, tanba ne’e presiza hadi’a kualifikasaun manorin sira inklui kondisaun infraestrutura sira.

Maski nune’e, kondisaun sira seidauk garante estudante sira iha sala aula nia laran, tanba ne’e presiza halo konstrusaun no reabilitasaun ba infraestrutura edukativa tanba disponibilidade bee-moos no hariis fatin sei limitadu. Asesibilidade estudante sira entre ema ho defisiénsia sira sei menus inklui manorin espesializada sira.

“Problema sira hanesan ne’e maka Ministériu Edukasaun iha nafatin kompromisu atu hasa’e asesu no kualidade edukasaun liuhosi kooperasaun entre liña ministeriál sira, parseiru nasionál no internasionál atubele responde preokupasaun sira,” nia akresenta.

Esforsu sira ne’e maka foin lalais MEJD konsege lansa programa prioridade hitu kona-ba instalasaun liña internet iha eskola, bolsa estudu méritu, eskola iha uma, fó kapasitasaun ba líder eskola no manorin sira liuhosi grupu traballu líder no grupu traballu manorin sira inklui kontinua halo formasaun ba manorin sira iha área oin-oin, jestaun sala aula, edukasaun inkluziva, pedagójika, kurríkulu, no planu lisaun liuhosi INFORDEPE.

“itItaa halo nafatin apoiu materiál no ekipamentu, impresaun represaun no distribuisaun livru ba labarik sira, hadi’a fasilidade bee-moos no saneamentu, hadi’a konstrusaun edukativa, ne’ebé iha tinan ida-ne’e halo hela no prosesu konstrusaun ba eskola hamutuk 230, ne’ebé tuir planu iha tinan 2023 ne’e sei hadi’a tan eskola hamutuk 300,” Minstru informa.

Daudaun iha hela prosesu integra feramenta ba identifikasaun funsionamentu labarik hodi identifika labarik sira ho difikuldade oin-oin iha uma no eskola.

“Ho nune’e, liuhosi eventu ida-ne’e atu fahe meta no asaun hodi asegura labarik sira iha jerasaun tuir mai bele asesu kualidade edukasaun ida di’ak liu ne’ebé sei kontribui ba dezenvolvimentu kapitál umanu no ba dezenvolvimentu Timor-Leste tomak. Ha’u hakarak husu atubele ativu no hola parte iha diskusaun grupu hodi bele transforma sistema edukasaun Timor-Leste ne’ebé tuir nesesidade estudante sira hodi aselera progresu hodi bele atinje meta Objetivu Dezenvolvimentu Sustentável (ODS) númeru 4,” nia tenik.

Nia mós, nota katak Konstituisaun Demokrátika Timor-Leste (K-RDTL) rekoñese no garante katak ema hotu iha direitu hanesan ba edukasaun no kultura, nune’e Estadu nia papél atu promove estabelesimentu edukasaun báziku ne’ebé universál no obrigatóriu ba ema hotu ho gratuitu.

Durante tinan 20 resin, setór edukasaun atinje rezultadu di’ak, ne’ebé barak iha Timor-Leste mak hanesan aumenta taxa matríkula hosi Edukasaun Pre-Eskolár (EPE) hosi 16% no besik 30% iha tinan 2021, nune’e mós taxa matríkula ba ensinu báziku ka primária iha tinan 2020 sa’e ba 86,5% kompara ho tinan 2005 iha de’it 64%.

Nune’e mós, iha fali igualdade jéneru sékulu dahuluk ensinu báziku, nível literasia aumenta ba grupu populasaun idade sira, hasa’e númeru inskrisaun dahuluk no datoluk hosi tinan 2011 no 2018, ne’ebé manorin sira barak mak treinadu ona, disponibilidade livru no mobiliáriu sira aumenta maski seidauk sufisiente.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!