PNTL Bobonaro koloka efetivu 145 asegura graduasaun kandidatu PSHT

BOBONARO, 11 agostu 2022 (TATOLI) — Polísia Nasionál Timor-leste (PNTL) komandu munisípiu Bobonaro, sei koloka membru efetivu 145 hodi asegura serimónia graduasaun ba kandidatu arte-marsiál Persaudaraan Setia Hati Terate (PSHT) tinan 2022 nian.

Komandante Operasaun PNTL munisípiu Bobonaro, Inspetór Xefe Armando Sila, esplika bazea ba oráriu hosi estrutura PSHT katak serimónia ne’e sei realiza iha jináziu Maliana no armazein kompañia Sembuhan Unipesoál Lda, Soso, Maliana, ne’ebé sei realiza iha loron 22 fulan ne’e.

Notísia relevante: IKS-KORK prontu fó seguransa ba serimónia graduasaun PSHT iha Bobonaro

“Ami hetan ona orientasaun hosi espesiál hosi ami-nia komandu jerál atu uza efetivu tomak mai hosi postu administrativu sira, atu asegura serimónia graduasaun, ami komandu munisípiu Bobonaro sei uza efetivu porvolta de 145,” nia informa ba Jornalista sira, iha kna’ar-fatin, kinta ne’e.

Inspetór xefe ne’e akresenta, efetivu hirakn-e’e sei apoia mós hosi Batallaun Orden Públika (BOP) kompañia Delta Soso, Maliana, Unidade Patrullamentu Fronteira (UPF) noFalintil-Forsa Defeza Timor-Leste (F-FDTL), postu destakamentu Tunubibi no ekipa bombeiru bainhira nesesita.

“Seguransa ne’e la’ós mai hosi PNTL mesak de’it, maibé hosi organizasaun sira hotu presiza fó apoiu ho intensaun atu garante katak, serimónia graduasaun ba organizasaun PSHT bele la’o ho di’ak no susesu,” nia apela.

Komandante Operasaun ne’e dehan, ekipa seguransa daudaun ne’e preparadu atu fó seguransa ba eventu ne’e, ne’e duni ba individu ka grupu ne’ebé hakarak tenta halo problema sei atua tuir lei.

“Atu apela ba komunidade tomak iha munisípiu Bobonaro, espesiál iha Maliana, atu hakmatek, bele asiste, maibé hakdook-aan hosi violénsia,” nia fó hanoin.

Iha loron-kuarta ne’e, delegasaun Dewan Pengesahaan PSHT hamutuk na’in-113 hosi sentrál Madium, Repúblika Indonézia  to’o ona Timor-Leste liuhosi pontu entrada Mota-Ain, suku Batugade, postu administrativu Balibo, ne’ebé simu hosi ekipa Sekretaria Estadu Juventude no Desportu (SEJD) no autoridade seguransa sira.

Armando dehan, delegasaun hirak-ne’e balun desloka ba Dili no munisípiu sira seluk no na’in-neen destaka iha munisípiu Bobonaro.

“Sira na’in-neen ne’e hosi Indonézia, ida hosi Dili hamutuk hitu, horisehik ami akompaña hosi postu Mota-ain to’o Maliana, sira na’in-neen nia hela-fatin idetifikadu, sira sei hela iha-ne’e, hahú ohin, atu fó teste jago ba kandidatu sira-ne’ebé mak sei hetan graduasaun iha loron 22 agora,” nia haktuir.

Iha loron 11 fulan-agostu ne’e, ekipa dewan Penegesahan tingakt II halo atividade teste jago iha munisípiu Bobonaro ba totál ranting lima hanesan, Nunura ihq suku Tapo-Memu, ospitál-tuan iha suku Holsa, koni Rai-Maten iha suku Odomau, Sene iha suku Holsa, Obor, suku Raifun, postu administrativu Maliana.

“Ita halo seguransa ne’e atu asegura katak sira-nia prezensa iha munisípiu Bobonaro ne’e, hahú horisehik to’o sira fila karik ho kondisaun ne’ebé di’ak,” nia hateten.

Kandidatu PSHT Bobonaro ne’ebé atu sa’e sintu na’in-974, mai hosi postu administrativu Atabae 81, Balibo 152, Cailaco 78, Maliana 476, Bobonaro 108 no postu administrativu Lolotoe 79.

Notísia relevante: Kandidatu PSHT munisípiu haat sei gradua iha Jináziu Maliana

Jornalista: Sérgio da Cruz

Editór: Evaristo Soares Martins