HEADLINE, KAPITÁL, NASIONÁL

Benefisiáriu PMOHA na’in-18 sei halo estudu komparativu iha Koreia Súl

Benefisiáriu PMOHA na’in-18 sei halo estudu komparativu iha Koreia Súl

Vise-Ministru Administrasaun Estatál, Lino de Jesus Torezão. Imajen Tatoli/Francisco Sony

DILI, 12 agostu 2022 (TATOLI)–Benefisiáriu Programa Saemaul Undong ka Programa Movimentu Hafoun Aldeia (PMOHA) hamutuk na’in-18, iha segunda (15/08) sei arranka ba Koreia Súl.

Vise-Ministru Administrasaun Estatál, Lino de Jesus Torrezão, hateten, baze fundamentál programa ne’e mak akordu ne’ebé selebra iha tinan 2016, ne’ebé iha tempu ne’ebá iha prátika konkretizasaun hahú iha munisípiu Lautém, iha aldeia haat, nune’e iha tinan 2022 ne’e ita hahú fali iha aldeia haat iha munisípiu rua (Ainaro no Ataúro).

“Sira ba apreende kona-ba dezenvolvimentu no ekonomia Koreia tanba programa ne’e Koreia nian mak hatuur mai Timor-Leste liuhosi akordu ida oinsá ita bele haburas ita-nia ekonomia iha aldeia,” governante ne’e informa iha edifísiu MAE, sesta ne’e.

Notísia relevante: Governu sei implementa PMOHA iha Dili-Bobonaro-Ermera-Baucau-Ainaro  

Benefisiáriu 18 ne’e kompostu hosi kada aldeia iha na’in-haat hanesan mai hosi munisípiu rua (Aileu no Ataúro), hanesan Aileu (aldeia Lekitura no Seloi-kraik), enkuantu Ataúro (aldeia Adara no Pala no restu hosi responsável Governu hosi Ministériu Administrasaun Estatál (MAE).

Estudu komparativu sei realiza durante semana rua iha sentru formasaun Koreia Súl.

“Sira ba espesífiku halo estudu komparativu ida, tanba ne’e maka sira ba ne’e iha sentru formasaun ida iha Koreia hodi haree dezenvolvimentu ekonomia, nune’e bele mai implementa fali iha sira-nia aldeia tanba programa ne’e foku ba aldeia la’ós suku,” Vise-Ministru akresenta.

Orsamentu ba kada aldeia $20.000 ba kada tinan hosi Governu Koreia Súl no programa ne’e hala’o durante tinan-lima.

Xefe Komité, João da Costa, agradese ba oportunidade no iha esperansa benefisiáriu programa sira bele apreende buat ruma.

“Ami preparadu atu ba Koreia tanba iha tinan kotuk ami hala’o ona servisu balun no programa Saemaul ne’e iha munisípiu Aileu no Atauro. Ho esperiénsia naton ne’ebé ami hetan, ho orsamentu ba kada aldeia, ami bele hala’o atividade ne’ebé prevee iha programa ne’e,” nia tenik.

Servisu ne’ebé sira hahú maka sei prepara sentru ida hodi akumula hamutuk hodi realiza atividade sira.

Jornalista    : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!