DILI, 12 agostu 2022 (TATOLI)–Institutu Superiór Filozofia Teolojia (ISFIT) Dom Jaime Garcia Goulart Fatumeta no Universidade Gaja Mada (UGM) Indonézia selebra ona akordu ba dahuluk hodi halo atividade tolu iha fronteira durante tina-lima, hosi tinan 2023 to’o 2028.
“Ita halo kooperasaun ho UGM ne’e hodi foka liu ba pilár tolu importante iha tinan 2023, maka hanesan hanorin, peskiza no servisu sosiál iha área fronteira,” Vise-Reitór ISFIT ne’ebé trata asuntu estudantíl no kooperasaun, Elídio Agostu Guterres, informa iha kampus ISFIT, Fatumeta, sesta ne’e.
Atividade hanorin hahú ona hosi atividade semináriu no sei kontinua ho atividade seluk, ne’ebé dosente ISFIT no UGM sei halo vizita ba malu, hafoin sei halo peskiza konjunta entre instituisaun ensinu superiór rua.
“Atividade hotu ita sei realiza iha tinan 2023, projetu planu no tema ba atividade sira ne’e ita prepara hotu ona,” nia akresenta.
Notísia relevante: Padre Justino husu estudante finalista 102 kuidadu imajen ISFIT iha sosiedade
Atividade konjunta ne’ebé ISFIT ho UGM sei realiza iha fronteira iha tinan 2023 ne’e sei loke ba fakuldade hotu, atu nune’e bele haree kualidade edukasaun Timor-Leste sai di’ak liután.
Iha fatin hanesan, Reprezentante Reitór UGM, Made Andi Arsana, konfesa katak nia parte sente kontente tanba bele halo kooperasaun ho ISFIT iha atividade universidade no atividade ne’e hodi hala’o iha área fronteira nasaun rua, tanba atividade ne’e sei fó mós benefísiu ba populasaun sira.
“Ha’u hanoin di’ak liu ita moris labele iha fronteira, karik iha mós atu di’ak liu ne’e labele uza morru. Tanba se lae ita nu’udar viziñu sei laiha ona komunikasaun ba malu. Tanba ne’e nu’udar viziñu, di’ak liu ita tenke fó ba malu saida mak ita iha, ida-ne’e maka ha’u sente bainhira primeira vez tau ain iha Dili,” nia tenik.
Nia dehan, universidade sira defende hanoin ida hodi hametin unidade.
“Tanba ne’e kada universidade tenke nafatin asegura no dudu hanoin sira sai ida de’it no espera katak kestaun ne’e mós sei bele akontese iha nasaun Timor-Leste. Nune’e mós Universidade tenke halo transformasaun no sai mós líder ba transformasaun hodi bele hanorin komunidade sai hosi fatin ida ba fatin sira seluk,” nia salienta.
Reitór UGM iha esperansa, liuhosi akordu kooperasaun ne’ebé maka realiza entre parte rua UGM prontu atu apoiu ISFIT iha atividade saida de’it no fiar katak buat hotu ne’ebé sei realiza iha tinan 2023 bele kesi liután amizade entre komunidade nasaun rua no sira bele aseita direita atividade sira iha fronteira.
Jornalista : Tomé Amado
Editora : Julia Chatarina
