DILI, 27 abril 2022 (TATOLI)—Institutu Superior Filozofia no Teolojia (ISFIT) Dom Jaime Goulart Fatu-meta, kuarta ne’e, realiza seremónia judisium ba estudante 102, kompostu hosi nível lisensiatura hosi fakuldade filozofia 83 no lisensiatura hosi fakuldade teolojia 19 inklui feto na’in-tolu.
Reitór ISFIT, Padre Justino Tanec, husu ba finalista atu kontinua tane a’as nafatin naran instituisaun superiór ne’e iha sosiedade nia le’et.
“Husu ba estudante finalista atu utiliza didi’ak buat ne’ebé hetan ho kredibilidade institusionál no buka atu aplika matenek iha sosiedade nia le’et no fatin serbisu. Labele haluha lori nafatin naran ISFIT iha serbisu fatin, tane didi’ak naran ida-ne’e ho kualidade hodi hamorin liután instituisaun superiór nia naran inklui bele ajuda sosiedade no igreja,” Reitór ISFIT hateten durante seremónia ne’ebé hala’o iha salaun Katedrál Vila Verde, kuarta ne’e.
Notísia relevante: ISFIT sei hala’o graduasaun dahuluk ba finalista 100
Judisium iha faze ne’e sei tama iha segunda graduasaun, ne’ebé sei realiza iha loron 29 abril 2022.
Reitór apresia ho esforsu estudante 120 konsege termina ona estudu, ne’ebé antes ne’e liu hosi prosesu estudu naruk no todan hodi kompleta semestre ualu durante tinan-haat, ne’ebé akademikamente estudante ida-idak tenke konklui kréditu 240 mak foin bele termina prosesu hodi hakat ba graduasaun.
Estudante ISFIT ba tinan letivu ne’e hamutuk 500 resin, kompostu hosi filozofia iha 434 no teolojia iha 100 resin.
“Sira bele halo esforsu hodi kria serbisu no buka serbisu tuir transkrisaun valór no dokumentu nesesáriu ne’ebé sira hetan iha prosesu judisium no graduasaun nia laran,” Reitór akresenta.
Jornalista : Tomé Amado
Editora : Julia Chatarina
