PM Taur agradese TL-EUA formaliza prinsípiu resiprosidade
BOBONARO, 12 agostu 2022 (TATOLI)-Primeiru Ministru, Taur Matan Ruak, kontente no agradese tanba Timor-Leste no Estadu Unida Amérika (EUA) formaliza ona prinsípiu resiprosidade ne’ebé lori tinan naruk tebes.
Taur Matan-Ruak hato’o agradesimentu ne’e iha nia diskursu sesta ne’e, hafoin halo lansamentu ofisiál ba atividade kolleta ikan Nila-Tilapia, hamutuk tonelada ualu, iha suku Leohitu, postu administrativu Balibo, munisípiu Bobonaro.
Notísia relevante: TL-EUA asina akordu arrendamentu rai no uma-Estadu
“Enkarregadu negósiu ohin dehan, governu no estadu unidus mós fó fatin ba ita-nia embaxada, ne’e tinan barak loos ona, finalmente ita hetan ona akordu, entaun parabéns ba Timor-Leste no parabéns ba Estadu Unidus,” Xefe Governu kontente.
Iha ámbitu ne’e, xefe governu orienta komunidade sira iha suku Leohitu, basa- liman maka’as ba Enkarregadu Negósiu hosi Estadu Unida Amerika nian,Tom Daley, tanba liuhosi nia esforsu hetan ona akordu arrendamentu rai no uma estadu durante tinan 50 ho prinsípiu resiprosidade.
“Iha ita-nia istória Timor, ita hetan ona akordu ida ho embaixada estadu unida kona-bá rai, tanba embaixada hakarak hadi’ak nia fatin, halo uma di’ak, maibé tenke rai ne’e loos,” Xefe Governu apresia.
Notísia relevante: Relasaun TL-EUA Kontinua Eselente
Jornalista: Sérgio da Cruz
Editór: Evaristo Soares Martins
