HEADLINE, INTERNASIONÁL, POLÍTIKA

TL-EUA asina akordu arrendamentu rai no uma-Estadu

TL-EUA asina akordu arrendamentu rai no uma-Estadu

Foto hamutuk entre Ministru justisa, Tiago Sarmento ho Enkaregadu negósiu embaixada EUA iha Timor-Leste, Tom Daley, inklui Ministra negósiu estranjeiru no kooperasaun, Adalijiza Magno ho nia Vise, Julião da Silva, hafoin asinatura akordu kona-ba arredamentu rai no uma Estadu, Iha MNEC, Praia dos Coqueiros, Dili, sexta (12/08). Imajen Tatoli /Egas Cristovão

DILI, 12 agostu 2022 (TATOLI)-Governu liuhosi Ministru Justisa, Tiago Amaral Sarmento, ho Enkarregadu Negósiu Estadu Unidus Amérika (EUA) iha Timor-Leste, Tom Daley, sesta ne’e asina akordu arrendamentu rai no uma Estadu ne’ebé maka durante ne’e EUA uza hodi hala’o misaun iha Timor-Leste.

Ministru Justisa, Tiago Amaral Sarmento, hateten nasaun barak inklui EUA maka estabelese ona ninia embaixada iha Timor-Leste durante tinan 20 hafoin restaurasaun independensia iha loron 20 fulan-maiu 2022, maibé Estadu seidauk estabelese akordu arrendamentu ho sira.

Notísia Relevante :Semana ne’e, MJ-EUA selebra akordu arrendamentu rai no uma

“Iha akordu arrendamentu ne’e, ita fó ba sira rai no uma ne’ebé maka daudaun ne’e okupa  hosi  Embaixada Estadu Unidus Amérika (EUA) iha Praia dos Coqueiros Dili, sira mós entrega rai iha Washington no Nova Iorke ho valór simbólika tuir prinsipiu resiprosidade, signifika ita fó sira, no sira mós fó ba ita,” Ministru Justisa Tiago Amaral Sarmento, hateten hafoin asina akordu ne’e iha Salaun MNEK, ohin.

Iha nota arrendamentu ne’e,  nasaun rua konkorda hodi implementa durante tinan-50.  Tanba ne’e,  kada tinan EUA la selu ona arrendamentu rai no uma Estadu ba Timor-Leste no Timor-Leste mós la selu arrendamentu ba EUA tanba tuir ona prinsipiu resiprosidade.

Governante ne’e dehan akordu arrendamentu ne’ebé maka ohin asina, sei aplika mós ho nasaun seluk ne’ebé maka daudaun estabelese ona sira-ninia embaixada iha Timor-Leste.

“Depois ita asina akordu arrendamentu rai no uma Estadu ho Embaixada EUA iha Timor-Leste, semana rua ka tolu mai tan, ita sei  aplika mós ba embaixada sira ne’ebé  iha Timor-Leste”, tenik Tiago.

Nia hatutan durante ne’e Timor-Leste aluga  uma andar hodi sai ninia embaixada iha estranjeiru, maibé iha Timor-Leste Governu atribui uma no rai Estadu ba sira. “Ida ne’e la justu, tanba ne’e maka ita hakarak aplika ba Embaixada sira hotu  ne’ebé maka iha ne’e,  nune’e sira kumpre resiprosidade”.

Iha fatin hanesan, Enkarregadu Negósiu Estadu Unidus Amérika (EUA) iha Timor-Leste, Tom Daley, hateten nia parte kongratula Governu Timor-Leste tanba bele selebra ona akordu arrendamentu ho Governu EUA .

“Akordu ne’e, parte Timor-Leste atribui rai no uma, no ami mós entrega rai rua iha Washintong no Nova-Iorke ho medida ne’ebé maka hanesan  ho rai ne’ebé agora ami halo ami-nia Embaixada iha ne’e.  No durante tinan 50 ami la selu arrendamentu ba Estadu Timor-Leste tanba tuir de’it prinsipiu resiprosidade”, nia reforsa.

Nia hateten reprezenta Estadu EUA hakarak hato’o agradesimentu boot ba Timor-Leste tanba estabelese ona akordu ne’e durante tinan 50.

Entretantu, seremonia asina akordu arrendamentu ne’e hala’o iha Salaun Nobre Ministeriu Negósiu Estrajeiru no Koopersaun (MNEK ne’ebé  asiste direta hosi Ministra Negósiu Estrajeiru  Kooperasaun, Adaljiza Albertina Xavier Reis Magno no Vise Ministru, Julião da Silva no seluk tan.

Notísia Relevante :MJ rejista kompañia 220 seidauk selu areendamentu ba Estadu

Jornalista    : Natalino Costa

Editór            : Agapito dos Santos

iklan
iklan

Leave a Reply

iklan
error: Content is protected !!