DILI, 26 jullu 2022 (TATOLI)—Ministru Justisa (MJ), Tiago Amaral Sarmento, informa semana ne’e hahú selebra akordu tuir prinsípiu resiprosidade ho Embaixada Estadu Unidu Amérika (EUA) iha Timor-Leste kona-ba atribuisaun fatin liuhosi arrendamentu rai no uma.
“Semana ne’e nia laran, ita finaliza akordu resiprosidade ho Estadu Unidu Amérika (EUA), liuliu arrendamentu rai no uma Estadu, katak ita entrega rai no uma Estadu ba sira ho valór simbolika, nune’e mós sira husi EUA sei atribui ba ita uma no rai hodi halo ita nia embaixada iha sira nia ka iha Nova Iorke,” Governante ne’e hateten ba jornalista iha Gabinete MJ, Colmera, tersa ne’e.
Notísia relevante: Tempu besik, Governu asina akordu arrendamentu rai no uma ho EUA
Governu liuhosi Ministériu Justisa hakarak aplika prinsípiu resiprosidade ho embaixada sira iha Timor-Leste, kona-ba arrendamentu rai no uma atubele iha tratamentu hanesan mós ho Embaixada Timor-Leste iha rai li’ur.
Aplika prinsípiu resiprosidade ne’e signifika katak bainhira Governu Timor-Leste fasilita fatin ba embaixada-sira hosi rai li’ur, tenke fasilita mós fatin ba embaixada Timor-Leste nian-iha diaspora.
“Ho akordu resiprosidade ida ne’e, nasaun rua bele respeita malu, tanba ne’e Estadu Unidu Amérika mós entrega ona rai iha fatin Washington no Nova Iorke atu konstrui ita nia Embaixada iha ne’ebá. Tanba ne’e pasu positivu ida ba ita,” afirma Governante ne’e.
Tanba, nia dehan durante ne’e Embaixada Timor-Leste iha rai li’ur inklui iha EUA aluga apartamentu tanba laiha fatin ne’ebé embaixada sira eziste ba.
“Maibé ho akordu resiprosidade ne’e ita bele respeita malu, hodi kumpre saida maka hakerek ona iha akordu laran,” Ministru Justisa ne’e garante.
Governante ne’e hatutan: “Ha’u hanoin kona-ba arrendamentu rai ita ho Estadu Unidu Amérika (EUA) laiha problema, parte rua ita nian ho sira laiha problema. Ita fó rai ba EUA halo atividade diplomatiku iha ita nia rai. Parte EUA mós fó rai iha Washington, Nova Iorke atu estabelese ita-nia Embaixada ne’ebá. Iha relasaun bilaterál sempre iha resiprosidade katak, ita fó ba sira no sira mós fó ba ita”, Governante ne’e realsa.
Governu Timor-Leste fó arrendamentu ho valór simbolikamente hosi prazu ne’ebé maka iha no parte rua aseita hotu atu asina akordu arrendamentu ba tinan-50.
Nune’e, Ministériu Justisa hahú koordena ona ho Ministériu Negosiu Estranjeiru no Kooperasaun (MNEK) atu formaliza akordu arrendamentu ne’e.
Alende ne’e, Ministru Tiago mós kompromete sei aplika akordu arrendamentu rai ho Embaixada sira iha Timor-Leste, ne’ebé seidauk iha akordu arrendamentu ho Estadu Timor-Leste.
Notisia relevante: Governu hakarak aplika prinsípiu resiprosidade ho embaixada-sira iha TL
Jornalista : Natalino Costa
Editór : Florencio Miranda Ximenes
