DILI, 15 agostu 2022 (TATOLI)—Prezidente Repúblika (PR), José Ramos Horta, husu autoridade polísia no judisiál prosesa arguidu na’in-sia (9) ne’ebé deskonfia envolve iha kazu droga tuir lei ne’ebé vigora iha Timor-Leste.
Notísia Relevante: Deskonfia komete aktu ilísitu ba droga, Arguidu na’in-sia submete ba interrogatóriu dahuluk
“Ne’e kestaun ida ha’u akompaña maibé ne’e pertense ba ita-nia polísia no judisiál. Kuandu elementu ruma no sé-sé mak envolve iha krime, ida-ne’e prosesa tuir ita-nia lei rasik,’’ PR Horta hateten ba jornalista sira hafoin partisipa aniversáriu ASEAN ba dala-55 ne’ebé realiza iha embaixada Tailándia, Faról, segunda ne’e.
Xefe Estadu ne’e hateten, nia-parte ladúnn preokupa problema droga tanba droga ne’e akontese iha rai barak inklui Timor-Leste ne’ebé hanesan afin frazil maibé presiza oinsá atu kombate.
“Ladún preokupa ho ida-ne’e tanba problema droga ne’e iha rai seluk ne’ebé organizadu tebes hanesan Europa, Estadu Unidu Amérika, Singapura, Indonézia maibé la konsege taka problema ne’e. Defisíl tebes no Timor-Leste nu’udar Estadu frazil nafatin, ne’eduni perigu tama iha ne’e,” nia hateten.
Tuir Horta, sosiedade Timor-Leste ladún monu tentasaun ba droga mezmu nune’e nia-parte nafatin husu timoroan hotu atu hadook an hosi droga.
“Iha ita-nia sosiedade ladún monu tentasaun droga, purtantu nu’udar Prezidente Repúblika no lidér nasionál ha’u sei kontinua ko’alia ba joven sira soe droga, alkol, soe violénsia,” nia apela.
Jornalista : Nelson de Sousa
Editór : Cancio Ximenes
