DILI, 14 agostu 2022 (TATOLI)—Tribunál Distritál Dili (TDD), domingu (14/8) ne’e realiza julgamentu interrogatóriu dahuluk ba arguidu na’in-sia ba kazu tráfiku no atividade ilísita.
Ministériu Públiku liuhosi julgamentu ne’e akuza arguidu sira ho krime tráfiku no atividade ilísita ne’ebé previstu iha artigu 7 (tráfiku no atividade ilísita) lei númeru 02/2017, 25 janeiru.
Arguidu sira ho inisiál DGS, MM, B, MAA, AY, SSO, M, CRMS no J ne’e ekipa konjunta hosi Servisu Nasionál Intelijénsia (SNI), Ekipa intelijénsia J2 hosi FALINTIL-Forsa Defeza Timor-Leste (F-FDTL), no Polísia Sientífika Investigasaun Kriminál (PCIC, sigla portugés) konsege identifika iha loron 11 to’o 12.
Ho identifikasaun ne’e, ekipa konjunta halo buska no detein arguidu sira iha fatin diferente iha kapitál Dili. Nune’e mós halo apreensaun ba sasán sira ne’ebé konsidera hanesan faktu hodi prova matéria akuzasaun.
Matéria sira ne’ebé konsege rekolla iha prosesu apreensaun mak droga ho tipu ganja hachis, hachis xokolate, pipeta ne’ebé sempre utiliza hodi administra droga ho tipu sabu-sabu no xokolate no hachis 1/5, droga sabu-sabu ho 0,50g inklui mós osan ho totál $4,139.25 ne’ebé deskonfia rezultadu hosi tranzasaun droga.
Antes submete ba julgamentu primeiru interrogatóriu iha tribunál distritál Dili, PSIK detein arguidu sira durante oras 72 iha sela PSIK.
Estaqui Guterres nu’udar defensór hosi defensoria públika ba jornalista sira hatete, julgamentu ne’e tribunál adia ba loron segunda, (15/8) tuku 10.00 hodi rona deklarasaun arguidu sira.
“Alegasaun no desizaun ba arguidu sira seidauk iha, tanba tribunál adia ba aban (15/8) mak foin halo alegasaun no desizaun”, katak defensór hafoin julgamentu iha TDD, domingu ne’e.
Tuir lei númeru 2/2017, 25 janeiru, ne’ebé previstu iha artigu 7, kona-ba tráfiku no atividade ilísita; alínea 1) ema ruma, lahó autorizasaun, kuda, produz, fábrika, hasai, prepara, oferese, tau folin, fa’an, distribui, sosa, fó, ka tan títulu ruma simu hosi ema seluk, fó de’it ba ema seluk, lori bá-mai, importa, esporta, halekar ka tahan ilísitu, ai-horis, substánsia ka preparasaun ne’ebé hakerek iha tabela I to’o III, lahó kazu hirak ne’ebé hatuur ona iha artigu 27, sei kastigu ho pena dadur tinan 5 to’o 15.
Alínea 2) ema ne’ebé hetan autorizasaun, maibé sakar buat ne’ebé hatuur tiha no prátika subar-subar aktu be temi iha númeru kotuk ba, sei kastigu ho pena dadur tinan 6 to’o 16. Alínea 3) kona-ba substánsia ka preparadu be hakerek iha tabela IV, ajente ne’e sei hetan kastigu pena daduur: a) Tinan 1 to’o 5, iha kazu númeru 1 no b) Tinan 2 to’o 8, iha kazu númeru 2.
Audénsia ne’e prezide hosi juiz José Goncalves, Ministériu Públiku reprezenta husi Prokuradór Rogeiro Viegas, arguidu sira hetan asisténsia legál hosi Defensór Públiku, Estaqui Guterres, Albino de Jesus Pereira no advogadu privadu, Arlindo Sanches, Fernando da Costa, Olivio, José Guterres, José Pedro Camões, Sergio, Cancio Freitas, Napolião de Oliveira.
Jornalista : Natalino Costa
Editór : Florencio Miranda Ximenes
