VIQUEQUE, 15 agostu 2022 (TATOLI)—Diretór Servisu Rejistu Sivil Munisípiu Viqueque, Aniceto Moreira, hateten, relasiona ho pedidu atendimentu dokumentu iha área rurál, daudaun ne’e seidauk iha orsamentu sufisiente tanba ne’e seidauk implementa.
“Ami planu ona atu halo atendimentu ba ita-nia komunidade iha baze, maibé difikuldade ne’ebé ami hasoru maka orsamentu, tanba ne’e planu ne’ebé ami trasa seidauk implementa,” Diretór informa ba Agência Tatoli, iha ninia knaar fatin, segunda ne’e.
Planu ne’ebé trasa ona ba suku no postu administrativu sira hanaran atendimentu online.
“Planu ne’e ho objetivu atu fasilita ita-nia inan-aman sira ne’ebé idade ona, nune’e sira bele fasil trata dokumentu sira,” nia akresenta.
Notísia relevante: Rejistu Sivil Viqueque rekolla taxa prosesa pasaporte $3.200 iha jullu
Daudaun ne’e sei menus fasilidade sira hanesan komputadór, leptop no transporte hodi fó atendimentu ba komunidade.
“Foin lalais xefe suku Ossu de Cima lori pedidu mai ha’u no iha pedidu ne’e husu atu ba halo atendimentu billete identidade no sertidaun nasimentu iha suku. Ha’u sei informa ba nasionál kona-ba asuntu sira ne’e no ha’u hatene oras-ne’e ita-nia idozu sira barak maka iha área rurál,” nia tenik.
Nia dehan, Rejistu Sivil esforsu hakarak implementa planu sira-ne’e iha tinan 2023 bainhira komplementa ona nesidade sira.
“Ha’u mós hato’o ona proposta ba nasionál karik hetan aprovasaun,” Diretór dehan.
Jornalista : Vitorino Lopes da Costa
Editora : Julia Chatarina
