Top

CNRT-FRETILIN: normaliza folin mina, loloos Governu fó subsídiu ba kompañia importadór

Plenária Parlamentu Nasionál. Imajen TATOLI/António Gonçalves.

DILI, 16 agostu 2022 (TATOLI)—Vise Bankada CNRT iha Parlamentu Nasionál (PN), Patrocínio Fernandes, fó hanoin ba Governu atu normaliza folin mina iha merkadu loloos Governu ninia intervensaun fó subsídiu ba kompañia importadór sira-ne’ebé durante ne’e hatama mina mai Timor-Leste.

Notísia Relevante: Governu lansa subsídiu voucher ba transporte públiku no operadór agríkola-peska

Patrocínio Fernandes hateten, Governu nia intervensaun ne’e dalaruma hanoin fó fali subsídiu ba transporte públiku sira-ne’e katak ema-ne’ebé presiza mina ne’e mak sira ne’ebé iha karreta ne’e, de’it depois sé mak fó subsídiu ba povu kbit laek sira-ne’ebé uza motor mós presiza mina ne’e oinsá.

“Hanoin Governu haree took didi’ak ida-ne’e no tuir ha’u-nia hanoin Governu nia intervensaun ne’e ba kompañia sira-ne’ebé mak suplay mina mai Timor-Leste, hodi bele normaliza folin ne’e iha merkadu. Nune’e ema hotu-hotu, ki’ikoan ka boot, bele asesu ba folin mina ne’e la’ós fó fali susbsídiu ba transporte públiku, depois povu baibain nafatin difikulta sira labele asesu ba mina,’’ Deputadu bankada opozisaun ne’e levanta iha reuniaun plenária komisaun permanente iha Parlamentu Nasionál, tersa ne’e.

Tuir nia, presiza subsídia ba kompañia tolu de’it mak bele suplay mina mai Timor-Leste, nune’e normaliza folin mina ba povu hotu.

“Loloos Governu fó se folin sae uitoan $0,80 sentavu entaun Governu foti $0,80 sentavu nia ka’er kada livru fó subsídiu ba kompañia tolu ne’ebé mak hatama mina mai, nune’e nia folin ne’e bele normaliza iha merkadu,” nia sujere.

Deputadu hosi bankada Fretilin, Marito Mota, sekunda ho ideia ne’e liga ba subsídiu mina nian katak tuir loloos Governu halo intervensaun ba kompañia tolu ne’ebé hatama mina hosi li’ur mai,  atu nune’e TL bele asesu mina ho folin ne’ebé baratu duké ba de’it ba transporte públiku sira.

Hatán ba kestuan ne’e, Prezidente Interinu Meza no Atuál Vise Prezidente PN, Maria Angelina, hateten preokupasaun deputadu sira-nian ne’ebé ohin levanta, tékniku sira hosi Ministériu Asuntu Parlamentár no Komunikasaun Sosiál (MAPKOMS) rejista hela sei responde iha tempu tuir mai.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!