Komunidade Covalima 13,771 simu ona vasina Booster Pfizer
COVALIMA, 16 agostu 2022 (TATOLI)–Diretora Servisu Saúde Munisípiu Covalima, Maria de Fátima Moniz, informa komunidade iha munisípiu Covalima hamutuk 13,771 simu ona vasina Booster Pfizer.
Notísia Relevante: Vasina Pfizer doze dahuluk iha Covalima atinje ona 100%
“Iha Covalima, ita-nia komunidade ne’ebé simu ona imunizasaun vasina Booster Pfizer to’o horisehik atinje ona 33,3% (ekivalente númeru 13,771) tuir alvu sidadaun 40,864. Agora, ita foin mak kobre 13,771 signifika ita sei iha 30%-resin mak ita presiza atu kobre hodi bele atinje 100%,” Maria de Fátima Moniz relata dadus ne’e ba Agência Tatoli iha nia kna’ar fatin, Camanasa, tersa ne’e.
Ho númeru komunidade ne’ebé vasina ona pesoál saúde sira kontinua esforsu nafatin, nune’e komunidade iha Covalima simu vasina bele atinje 100%.
“Pesoál saúde sira kontinua halo esforsu hodi halo imunizasaun vasina ba sidadaun sira bele kompleta vasina Booster Pfizer tanba ne’e foin lalais ita realiza enkontru, ita atu integra vasina COVID-19 ba iha vasina rutina. Ita la halo ona kampaña maibé ida-ne’e konsidera servisu ka imunizasaun loro-loron,” nia dehan.
Bazea ba rezultadu enkontru sei integra vasina COVID-19 ba iha imunizasaun hanesan loro-loron ne’ebé oferese ba sidadaun sira hanesan imunizasaun BCG, oferese ba labarik no bebé sira campak durante hala’o servisu rutina
Nia informa, estoke vasina iha armajen sei sufisiénte tanba foin lalais halo akizisaun husu 558 vial hela de’it 266 viál. Tuir alvu ne’ebé kobre iha fulan ida tanba vasina ne’ebé SAMES distribui sira konta de’it loron 30 tenke uza hotu, se uza la hotu tenke fó fila tanba ne’e liu ona prazu.
Jornalista : Celestina Teles
Editór : Cancio Ximenes
